ນາຍົກລັດຖະມົນຕີຈີນກ່າວເນັ້ນໃນກອງປະຊຸມສຸດຍອດອາຊີຕາເວັນອອກຄັ້ງທີ 10 ວ່າ: ຢຶດຖືການຮ່ວມມືຢ່າງສາມັກຄີກັນເພື່ອສ້າງອາຊີຕາເວັນອອກໃຫ້ເປັນຂົ້ວແຫ່ງການເຕີບໂຕໜັກແໜ້ນຂອງເສດຖະກິດໂລກ

ຕອນເຊົ້າວັນທີ 22 ພະຈິກນີ້, ທ່ານຫຼີເຄິ້ສຽງ, ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມສຸດຍອດອາຊີຕາເວັນອອກຄັ້ງທີ 10 ຢູ່ທີ່ສູນປະຊຸມສາກົນກົວລະລຳເປີ.

ໃນຄຳປາໄສ, ທ່ານຫຼີເຄິ້ສຽງໄດ້ປະກອບຄວາມຄິດຄວາມເຫັນກ່ຽວກັບການຮ່ວມມືຂອງກອງປະຊຸມໃນໄລຍະຕໍ່ໜ້າ, ຄື: ໜຶ່ງ, ເລັ່ງລັດຊຸກຍູ້ຂະບວນການເຊື່ອມຈອດກັນດ້ານເສດຖະກິດຂອງພາກພື້ນ, ເພື່ອສ້າງອາຊີຕາເວັນອອກໃຫ້ເປັນຂົ້ວເຕີບໂຕທີ່ໜັກແໜ້ນຂອງເສດຖະກິດໂລກ; ສອງ, ດຳເນີນການສົນທະນາກ່ຽວກັບຄວາມໝັ້ນຄົງດ້ານການເມືອງຢ່າງຕັ້ງໜ້າ, ເພື່ອປຶກສາຫາລືກ່ຽວກັບການສ້າງໂຄງລ່າງດ້ານຄວາມໝັ້ນຄົງທີ່ສອດຄ່ອງກັບພາກພື້ນນີ້; ສາມ, ເພີ່ມທະວີການແລກປ່ຽນແລະການສົນທະນາດ້ານອະລິຍະທຳອາຊີ, ຊຸກຍູ້ອະລິຍະທຳຕ່າງໆຢູ່ຮ່ວມກັນຢ່າງປອງດອງ.

ທ່ານຫຼີເຄິ້ສຽງໄດ້ຊີ້ອອກວ່າ, ປະເທດຕ່າງໆຢູ່ອາຊີຕາເວັນອອກອາໄສເຊິ່ງກັນແລະກັນ, ໄດ້ຄ່ອຍໆສ້າງເປັນປະຊາຄົມຮ່ວມຜົນປະໂຫຍດແລະປະຊາຄົມຮ່ວມໜ້າທີ່ຮັບຜິດຊອບ. ຂໍພຽງແຕ່ວ່າພວກເຮົາຢຶດຖືຈິດໃຈທີ່ຮ່ວມມືຢ່າງສາມັກຄີກັນແລະກວມລວມ, ເປີດກວ້າງຈຸດເຊື່ອມຕໍ່ຂອງຜົນປະໂຫຍດຢ່າງຕັ້ງໜ້າ, ຄວບຄຸມຄວາມຂັດແຍ້ງກັນຢ່າງມີປະສິດທິຜົນ, ກໍ່ສາມາດຮັກສາການຮ່ວມມືຢູ່ອາຊີຕາເວັນອອກໃຫ້ຢູ່ໃນເສັ້ນທາງພັດທະນາທີ່ປອດໃສ, ເພື່ອສ້າງຄວາມຜາສຸກໃຫ້ແກ່ປະຊາຊົນຂອງປະເທດຕ່າງໆ.

ທ່ານຫຼີເຄິ້ສຽງຍັງໄດ້ບັນຍາຍຫຼັກການ-ຫຼັກໝັ້ນຂອງຝ່າຍຈີນແລະຂໍ້ລິເລີມ 5 ຂໍ້ກ່ຽວກັບບັນຫາທະເລຈີນໃຕ້.