ຕອນບ່າຍວັນທີ 23 ພະຈິກນີ້, ພາຍຫຼັງສິ້ນສຸດການພົບປະເຈລະຈາ, ທ່ານຫຼີເຄີ້ສຽງ, ນາຍົກລັດຖະມົນຕີຈີນກັບທ່ານນາຈິບ ຕຸນ ຣາຊັກ, ນາຍົກລັດຖະມົນຕີມາເລເຊຍໄດ້ຮ່ວມກັນໃຫ້ສຳພາດຕໍ່ນັກຂ່າວ.
ທ່ານຫຼີເຄີ້ສຽງກ່າວວ່າ: ຝ່າຍຈີນຍິນດີເສີມຂະຫຍາຍທ່າແຮງຂອງຕົນ, ເຂົ້າຮ່ວມການສ້າງທາງລົດໄຟຢູ່ພາກໃຕ້ຂອງມາເລເຊຍແລະການສ້າງທາງລົດໄຟຄວາມໄວສູງມາເລເຊຍ-ສິງກະໂປກໍ່ຄືການກໍ່ສ້າງພື້ນຖານໂຄງລ່າງອື່ນໆ, ສົ່ງເສີມໃຫ້ວິສາຫະກິດຂອງສອງປະເທດເປີດກວ້າງການລົງທຶນຕໍ່ກັນ, ເພີ່ມທະວີການຮ່ວມມືໃນຂົງເຂດການຄ້າ, ການທະນາຄານ, ທະເລ, ການສຶກສາ, ວຽກງານປ້ອງກັນປະເທດແລະຂົງເຂດອື່ນໆຕື່ມອີກ. ຝ່າຍຈີນສົ່ງເສີມໃຫ້ປະຊາຊົນຈີນອອກໄປທ່ອງທ່ຽວມາເລເຊຍຫຼາຍກວ່າເກົ່າ, ເພີ່ມທະວີຄວາມເຂົ້າໃຈລະຫວ່າງປະຊາຊົນຂອງສອງປະເທດ, ຝ່າຍຈີນສະແດງຄວາມຍິນດີຕ້ອນຮັບຕໍ່ມາດຕະການກ່ຽວກັບການໃຫ້ຄວາມສະດວກດ້ານວິຊາຂອງຝ່າຍມາເລເຊຍໃນໄລຍະຢູ່ຢ້ຽມຢາມ.
ທ່ານຫຼີເຄີ້ສຽງກ່າວເນັ້ນວ່າ: ການທີ່ເຄົາລົບເຊິ່ງກັນແລະກັນ, ປະຕິບັດຕໍ່ກັນຢ່າງສະເໝີພາບ, ແລະໄວ້ເນື້ອເຊື່ອໃຈກັນຢ່າງເຊິກເຊິ່ງນັ້ນແມ່ນພື້ນຖານອັນໝັ້ນແກ່ນແລະຊັບສິນອັນລ້ຳຄ່າຂອງການພົວພັນລະຫວ່າງຈີນ-ມາເລເຊຍ. ຫວັງວ່າສອງຝ່າຍຈະສາມາດຮ່ວມກັນທຳຄວາມພະຍາຍາມ, ສືບທອດຊັບສິນອັນລ້ຳຄ່ານີ້ເປັນຢ່າງດີພ້ອມທັງຜັນຂະຫຍາຍໃຫ້ກວ້າງອອກ, ຮັບປະກັນການພົວພັນລະຫວ່າງຈີນ-ມາເລເຊຍໃຫ້ຂະຫຍາຍໄປໜ້າຢ່າງໝັ້ນທ່ຽງແລະປອດໃສ, ແລະຮັກສາຄວາມມີຊີວິດຊີວາແລະພະລັງແຮງຕະຫຼອດໄປ.
ທ່ານນາຈິບ ຕຸນ ຣາຊັກກ່າວວ່າ: ນັບແຕ່ມາເລເຊຍແລະຈີນສ້າງການພົວພັນຄູ່ຮ່ວມຍຸດທະສາດຮອບດ້ານເປັນຕົ້ນມາ, ການພົວພັນລະຫວ່າງສອງປະເທດໄດ້ຮັບຄວາມຄືບໜ້າຢ່າງຫຼວງຫຼາຍ. ການຮ່ວມມືແບບຕ່າງຝ່າຍຕ່າງມີຜົນປະໂຫຍດລະຫວ່າງມາເລເຊຍ-ຈີນມີຄວາມກວ້າງຂວາງ, ເຊື່ອໝັ້ນວ່າການພົວພັນລະຫວ່າງສອງປະເທດຈະສາມາດໄດ້ຮັບການປັບປຸງໃຫ້ດີຂຶ້ນແລະພັດທະນາກ້າວໄປໜ້າຕື່ມອີກ.
 |
