ນາຍົກລັດຖະມົນຕີຈີນກັບຄືນປະເທດແລ້ວ, ພາຍຫຼັງສິ້ນສຸດການຢ້ຽມຢາມ

ຫຼັງຈາກໄດ້ໄປເຂົ້າຮ່ວມກອງປະຊຸມຜູ້ນຳຈີນ-ອາຊຽນ (10+1) ຄັ້ງທີ 18, ກອງປະຊຸມຜູ້ນຳອາຊຽນກັບຈີນ, ຍິ່ປຸ່ນແລະສ.ເກົາຫຼີ (10+3) ຄັ້ງທີ 18 ແລະກອງປະຊຸມສຸດຍອດອາຊີຕາເວັນອອກຄັ້ງທີ 10, ພ້ອມທັງໄດ້ສຳເລັດການຢ້ຽມຢາມມາເລເຊຍຢ່າງເປັນທາງການຢ່າງຈົບງາມ, ຕອນຮຸ່ງເຊົ້າວັນທີ 24 ພະຈິກນີ້, ທ່ານຫຼີເຄິ້ສຽງ, ນາຍົກລັດຖະມົນຕີຈີນໄດ້ເດີນທາງໄປຮອດເມືອງຊູ່ໂຈ່ວ, ແຂວງຈ່ຽງຊູ່ຂອງຈີນດ້ວຍຍົນພິເສດ, ເພື່ອເຂົ້າຮ່ວມການພົບປະລະຫວ່າງຜູ້ນຳຈີນ-ເອິຣົບກາງແລະເອິຣົບຕາເວັນອອກຄັ້ງທີ 4 ທີ່ຈະຈັດຂຶ້ນຢູ່ເມືອງດັ່ງກ່າວ.

ໃນຂະນະທີ່ເດີນທາງອອກຈາກນະຄອນຫຼວງກົວລະລຳເປີຂອງມາເລເຊຍ, ໂດຍມີບັນດາເຈົ້າໜ້າທີ່ຂັ້ນສູງຂອງລັດຖະບານມາເລເຊຍ, ພ້ອມດ້ວຍທ່ານຫ່ວງຮຸ້ຍຄ່າງ, ເອກອັກຄະລັດຖະທູດຈີນປະຈຳມາເລເຊຍ, ແລະທ່ານຊູປູ້, ເອກອັກຄະລັດຖະທູດຈີນປະຈຳອາຊຽນໄດ້ອອກສົ່ງທ່ານຢູ່ທີ່ສະໜາມບິນ.