ຕາມຂ່າວCRI: ວັນທີ 27 ພະຈິກນີ້, ກະຊວງປ້ອງກັນປະເທດຈີນໄດ້ຈັດກອງປະຊຸມຂ່າວສະເພາະຢູ່ນະຄອນຫຼວງປັກກິ່ງ, ທ່ານຢາງຢູຈູນ, ຫົວໜ້າກົມຖະແຫຼງຂ່າວຂອງກະຊວງປ້ອງກັນປະເທດ, ໂຄສົກກະຊວງປ້ອງກັນປະເທດຈີນໄດ້ໃຫ້ການອະທິບາຍກ່ຽວກັບບັນຫາຕ່າງໆໃນດ້ານການປະຕິຮູບການປ້ອງກັນປະເທດແລະການທະຫານຢ່າງລະອຽດ.
ແຕ່ວັນທີ 24 ຫາວັນທີ 26 ພະຈິກນີ້, ຄະນະກຳມະການການທະຫານສູນກາງຈີນໄດ້ໄຂກອງປະຊຸມກ່ຽວກັບວຽກງານການປະຕິຮູບ, ເພື່ອຈັດຕັ້ງປະຕິບັດໜ້າທີ່ຂອງການລົງເລິກການປະຕິຮູບດ້ານການປ້ອງກັນປະເທດແລະການທະຫານ. ກອງປະຊຸມຄັ້ງນີ້ເປັນສັນຍາລັກສະແດງໃຫ້ເນັນວ່າການລົງເລິກການປະຕິຮູບດ້ານການປ້ອງກັນປະເທດແລະການທະຫານຂອງຈີນໄດ້ກ້າວເຂົ້າສູ່ໄລຍະປະຕິບັດຕົວຈິງ.
ທ່ານຢາງຢູຈູນກ່າວເນັ້ນວ່າ, ຈີນຈະຍຶດໝັ້ນຊູທຸງແຫ່ງສັນຕິພາບ, ການພັດທະນາແລະການຮ່ວມມືກັນຕະຫຼອດໄປ, ປະຕິບັດນະໂຍບາຍປ້ອງກັນປະເທດທີ່ມີລັກສະນະປ້ອງກັນຕົວມາໂດຍຕະຫຼອດ. ການທີ່ຫຼຸດກຳລັງຮົບຈຳນວນ 3 ແສນຄົນໄດ້ສະແດງໃຫ້ເຫັນອີກເທື່ອໜຶ່ງເຖິງຄວາມຕັດສິນໃຈອັນເດັດຂາດຂອງຈີນໃນດ້ານການພັດທະນາໂດຍສັນຕິ. ກອງທັບຈີນແມ່ນກຳລັງທີ່ໜຽວແໜ້ນໃນການປົກປ້ອງສັນຕິພາບຂອງໂລກແລະສະຖຽນລະພາບຂອງພາກພື້ນຕະຫຼອດໄປ.
ທ່ານຢາງຢູຈູນກ່າວວ່າ, ໜ້າທີ່ເປົ້າໝາຍຂອງການປະຕິຮູບຄັ້ງນີ້ຄື: ຈະໃຫ້ໄດ້ຮັບຄວາມຄືບໜ້າທີ່ມີລັກສະນະບຸກທະລຸໃນດ້ານລະບຽບການຄຸ້ມຄອງບໍລິຫານແລະລະບຽບການບັນຊາຮ່ວມໃນການສູ້ຮົບ, ໃຫ້ໄດ້ຮັບຜົນສຳເລັດທີ່ສຳຄັນໃນດ້ານການປະຕິຮູບການປັບປຸງອົງປະກອບ, ການຊຸກຍູ້ໃຫ້ທະຫານກັບປະຊາຊົນພັດທະນາເຊື່ອມໂຍງເຂົ້າກັນ, ພະຍາຍາມສ້າງເປັນລະບົບກຳລັງການທະຫານທີ່ທັນສະໄໝທີ່ມີສີສັນພິເສດຂອງຈີນທີ່ຈະຮັບໄຊຊະນະໃນສົງຄາມແບບຂໍ້ມູນຂ່າວສານ, ແລະປະຕິບັດໜ້າທີ່ຢ່າງມີປະສິດທິພາບ, ບູລະນະລະບຽບການທະຫານສັງຄົມນິຍົມທີ່ມີສີສັນພິເສດຂອງຈີນໃຫ້ສົມບູນກວ່າເກົ່າ.
 |
