ອະດີດຜູ້ນຳອິນໂດເນເຊຍອວຍພອນງານຮ້ອງເພງເພື່ອມິດຕະພາບຈີນ-ອາຊຽນ
2015-12-15 17:30:36 cri
ຕາມຂ່າວ cri: ຫວ່າງມໍ່ໆມານີ້ ຕາມທີ່ໄດ້ນັດໝາຍໄວ້ກັບພະແນກພາສາອິນໂດເນເຊຍຂອງວິທະຍຸສາກົນແຫ່ງປະເທດຈີນ, ທ່ານໂຢຊຸບ ຮາບີບີ ອະດີດປະທານາທິບໍດີອິນໂດເນເຊຍທີ່ກຳລັງພັກຜ່ອນຢູ່ເມືອງມູນິດຂອງເຢຍລະມັນໄດ້ສົ່ງວິດີໂອຕອນໜຶ່ງໂດຍຜ່ານຜູ້ຊ່ວຍຂອງທ່ານ, ເພື່ອວອຍພອນງານຮ້ອງເພງເພື່ອມິດຕະພາບຈີນ-ອາຊຽນປີ 2015 ທີ່ຈະຈັດຂຶ້ນໃນວັນທີ 16 ທັນວານີ້.
ໃນຄຳອວຍພອນ, ທ່ານຮາບີບີ ກ່າວວ່າ, ສອງປະເທດແລະປະຊາຊົນສອງຊາດອິນໂດເນເຊຍ-ຈີນມີມິດຕະພາບຕໍ່ກັນແລະຮ່ວມມືກັນ ແມ່ນສິ່ງທີ່ສຳຄັນທີ່ສຸດ, ແມ່ນກຳລັງທີ່ສຳຄັນໃນການສ້າງໂລກໃຫ້ດີຂຶ້ນໂດຍສະເພາະແມ່ນສ້າງຄວາມຜາສຸກໃຫ້ແກ່ພາກພື້ນອາຊີ. ການຮ່ວມມືຮອບດ້ານລະຫວ່າງອິນໂດເນເຊຍ-ຈີນຄວນສ້າງຂຶ້ນບົນພື້ນຖານແຫ່ງການແລກປ່ຽນດ້ານວັດທະນະທຳ, ການຮ່ວມມືດ້ານວິທະຍາສາດເຕັກນິກແລະຕ່າງຝ່າຍຕ່າງໄດ້ຮັບຜົນປະໂຫຍດດ້ານເສດຖະກິດ. ທ່ານຮາບີບີຂໍວອຍພອນໃຫ້ງານຮ້ອງເພງເທື່ອນີ້ດຳເນີນໄປດ້ວຍດີແລະໄດ້ຮັບຜົນສຳເລັດຢ່າງເຕັມເມັດເຕັມໜ່ວຍ. ທ່ານຍັງແນະນຳໃຫ້ຜູ້ຊົມຈີນຮູ້ກັບນາງບຸນກາ ຊີຕຼາ ເລສຕາຣີ ດາລາຜູ້ເກັ່ງໃນດ້ານຮ້ອງເພງ ສະແດງຮູບເງົາແລະລະຄອນໂທລະພາບອິນໂດເນເຊຍທີ່ໄປຮ່ວມງານຮ້ອງເພງເພື່ອມິດຕະພາບຈີນ-ອາຊຽນໃນຄັ້ງນີ້, ແລະຫວັງວ່າການສະແດງຂອງນາງຈະໄດ້ຮັບຄວາມນິຍົມຊົມຊອບຈາກຜູ້ຊົມຈີນ.
