(ທ່ານຫວາງເກິ່ງໜຽນ ຜູ້ອຳນວຍການ cri ພົບປະກັບຜູ້ຕາງໜ້າສື່ມວນຊົນບັນດາປະເທດອາຊຽນທີ່ມາເຂົ້າຮ່ວມງານຮ້ອງເພງເພື່ອມິດຕະພາບ 2015)
ຕາມຂ່າວ cri: ວັນທີ 16 ທັນວານີ້ ຜູ້ຕາງໜ້າສື່ມວນຊົນຕ່າງປະເທດທີ່ເປັນຄູ່ຮ່ວມມືໃນງານຮ້ອງເພງມິດຕະພາບຈີນ-ອາຊຽນ 2015 ທີ່ມານະຄອນຫຼວງປັກກິ່ງເພື່ອເຂົ້າຮ່ວມງານຮ້ອງເພງນັ້ນໄດ້ຢ້ຽມຢາມວິທະຍຸສາກົນແຫ່ງປະເທດຈີນ (CRI), ທ່ານຫວາງເກິ່ງໜຽນ ຜູ້ອຳນວຍການ CRI ໄດ້ພົບປະກັບບັນດາຜູ້ຕາງໜ້າ.
ທ່ານຫວາງເກິ່ງໜຽນໄດ້ສະແດງຄວາມຕ້ອນຮັບຕໍ່ບັນດາແຂກຜູ້ມີກຽດທີ່ມາຢ້ຽມຢາມ, ທ່ານກ່າວວ່າ, ຈີນກັບບັນດາປະເທດອາຊຽນແມ່ນເພື່ອນບ້ານທີ່ດີ, ທັງແມ່ນອ້າຍນ້ອງທີ່ດີ, ສື່ມວນຊົນລະຫວ່າງສອງຝ່າຍໄດ້ມີການຮ່ວມມືແລະແລກປ່ຽນກັນຢ່າງແໜ້ນແຟ້ນຂຶ້ນ. CRI ຍິນດີຈັດງານຮ້ອງເພງ ເພື່ອມິດຕະພາບໃຫ້ດີຂຶ້ນ, ທັງຈະອີງຕາມຂໍ້ລິເລີ່ມແຫ່ງການຮ່ວມມື "ແລວທາງເສດຖະກິດເສັ້ນທາງສາຍໄໝ ແລະເສັ້ນທາງສາຍໄໝທາງທະເລໃນສັດຕະວັດທີ 21" ຫຼື "ໜຶ່ງແລວທາງໜຶ່ງເສັ້ນທາງ" ເປີດກວ້າງການຮ່ວມມືກັບບັນດາສື່ມວນຊົນປະເທດອາຊຽນໃນດ້ານການສຳພາດລາຍງານຂ່າວ, ຈັດທຳລາຍການ, ການເຜີຍແຜ່ທາງສື່ໃໝ່, ການແລກປ່ຽນແລະຝຶກອົບຮົມວິຊີສະເພາະແລະດ້ານອື່ນໆ.
ທ່ານແຄມ ຄູນາວັດ ຜູ້ອຳນວຍການໃຫຍ່ໂທລະພາບແຫ່ງຊາດກຳປູເຈຍໄດ້ຕາງໜ້າສື່ມວນຊົນບັນດາປະເທດອາຊຽນປະກອບຄຳຄິດຄຳເຫັນ ໂດຍກ່າວວ່າ, ທ່ານເຫັນດີນຳຂໍ້ສະເໜີຂອງທ່ານຫວາງເກິງໜຽນກ່ຽວກັບການຮ່ວມມືລະຫວ່າງສອງຝ່າຍ. ທ່ານກ່າວວ່າ, ການຮ່ວມມືດ້ານສື່ມວນຊົນແມ່ນມີບົດບາດສຳຄັນທີ່ສຸດໃນການໄປມາຫາສູ່ກັນລະຫວ່າງບັນດາປະເທດອາຊຽນກັບຈີນ. ຄຽງຄູ່ກັບຈີນກາຍເປັນອົງກອນເສດຖະກິດທີ່ສຳຄັນໃນໂລກ, ປະຊາຄົມໂລກກໍ່ມີຄວາມຕ້ອງການຮູ້ຈັກຈີນໃຫ້ນັບມື້ນັບຫຼາຍຂຶ້ນ. ສະນັ້ນ ສື່ມວນຊົນສອງຝ່າຍຄວນຖືຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ແລະການພັດທະນາສື່ໃໝ່ເປັນໂອກາດ, ເຮັດໃຫ້ການແລກປ່ຽນແລະການຮ່ວມມືກັນມີຄວາມແໜ້ນແຟ້ນຂຶ້ນຕື່ມ, ເພື່ອປະກອບສ່ວນຂອງຕົນເອງເຂົ້າໃນການຂະຫຍາຍການພົວພັນຈີນ-ອາຊຽນ.
