ວັນທີ 16 ທັນວານີ້, ອົງການປົກຄອງຂອງເຂດບໍລິຫານພິເສດຮົງກົງຈີນປະກາດວ່າ: ນັບແຕ່ປີ 2016 ຫາປີ 2017 ເປັນຕົ້ນໄປ, ຈະອອກທຶນການສຶກສາ "ໜຶ່ງແລວທາງໜຶ່ງເສັ້ນທາງ" ຕໍ່ນັກສຶກສາຂອງອິນໂດເນເຊຍ, ເພື່ອດຶງດູດນັກສຶກສາຂອງອິນໂດເນເຊຍທີ່ດີເດັ່ນໄປຮຽນຕໍ່ຫຼັກສູດປະລິນຍາຕີຢູ່ເຂດພິເສດຮົງກົງ.
ຕາມຫ້ອງການຖະແຫຼງຂ່າວຂອງອົງການປົກຄອງເຂດພິເສດຮົງກົງໃຫ້ຮູ້ວ່າ: ມື້ດຽວກັນ, ພະແນກສຶກສາທິການຂອງອົງການປົກຄອງເຂດພິເສດຮົງກົງກັບກະຊວງສຶກສາທິການແລະວັດທະນະທຳຂອງອິນໂດເນເຊຍໄດ້ເຊັນບົດບັນທຶກຄວາມເຂົ້າໃຈກ່ຽວກັບການຮ່ວມມືດ້ານການສຶກສາຢູ່ນະຄອນຫຼວງຈາກາຕາຂອງອິນໂດເນເຊຍ, ເພື່ອເພີ່ມທະວີການຮ່ວມມືດ້ານການສຶກສາລະຫວ່າງສອງທ້ອງຖິ່ນດັ່ງກ່າວ; ອົງການປົກຄອງຂອງເຂດພິເສດຮົງກົງໄດ້ເປີດເຜີຍແຜນການທຶນການສຶກສາດັ່ງກ່າວພາຍຫຼັງໄດ້ເຊັນບົດບັນທຶກ.
ນັບແຕ່ປີ 2016 ຫາປີ 2017 ເປັນຕົ້ນໄປ, ອົງການປົກຄອງຂອງເຂດພິເສດຮົງກົງຈະມອບທຶນການສຶກສາໃຫ້ນັກສຶກສາອິນໂດເນເຊຍຫຼາຍທີ່ສຸດ 10 ຄົນທີ່ມາຮຽນຕໍ່ຫຼັກສູດປະລິນຍາຕີດ້ວຍທຶນຂອງລັດຢູ່ເຂດພິເສດຮົງກົງຜູ້ລະຫຼາຍທີ່ສຸດ 1 ແສນ 2 ໝື່ນໂດລາຮົງກົງຕໍ່ປີ. ຖ້າຍັງຕ້ອງການທຶນຊ່ວຍເຫຼືອຕ່າງຫາກ, ຜູ້ໄດ້ຮັບທຶນການສຶກສາດັ່ງກ່າວທຸກຄົນຍັງຈະສາມາດໄດ້ຮັບທຶນການສຶກສາຈຳນວນ 5 ໝື່ນໂດລາຮົງກົງທີ່ບໍລິຈາກໂດຍສ່ວນບຸກຄົນ.