ກອງປະຊຸມຄັ້ງທີ 20 ຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ ໄດ້ຈັດຂຶ້ນຢູ່ນະຄອນຫຼວງວຽງຈັນຂອງ ສປປ ລາວໃນວັນທີ 4 ກຸມພານີ້, ໂດຍການເປັນປະທານຂອງທ່ານ ພູໂຂງ ສີສຸລາດ ຫົວໜ້າກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດ ສປປ ລາວ ແລະ ທັງເປັນປະທານຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ ສຳລັບປີ 2016ເຊິ່ງມີຜູ້ຕາງໜ້າຂອງແຕ່ລະປະເທດອາຊຽນເຂົ້າຮ່ວມ.
ກອງປະຊຸມດັ່ງກ່າວ ແມ່ນກອງປະຊຸມສະໄໝສາມັນຄັ້ງທຳອິດ ຂອງຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ ສຳລັບປີ 2016 ໂດຍ ສປປ ລາວ ເປັນປະທານອາຊຽນໂດຍກອງປະຊຸມໄດ້ປຶກສາຫາລືແຜນການຈັດຕັ້ງປະຕິບັດວຽກງານ 5 ປີ (2016-2020) ໂດຍສະເພາະແຜນບູລິມະສິດໃນປີ 2016 ເຊິ່ງເປັນຂໍ້ລິເລີ່ມຂອງບັນດາປະເທດສະມາຊິກອາຊຽນ ເປັນຕົ້ນແມ່ນກອງປະຊຸມ ແລະ ການເຮັດບົດສຶກສາຄົ້ນຄວ້າກ່ຽວກັບສິດໃນການສຶກສາ, ສິດໃນການມີຊີວິດ, ລະບົບຍຸຕິທຳສຳລັບເດັກ, ສິດທິມະນຸດ ແລະ ການຕ້ານການຄ້າມະນຸດຢູ່ອາຊຽນ, ຄວາມຮັບຜິດຊອບຂອງບໍລິສັດຕໍ່ສັງຄົມ, ສື່ມວນຊົນ ແລະ ອົງການສິດທິມະນຸດ. ນອກນີ້ກອງປະຊຸມດັ່ງກ່າວຍັງໄດ້ປຶກສາຫາລື ການກຽມແຜນບູລິມະສິດ ສຳລັບປີ 2017 ແລະ ບົດລາຍງານປະຈຳປີ 2016 ຕື່ມອີກ.
