ຂ່າວສານຊິນຮວາລາຍງານໂດຍອ້າງຕາມອົງການປົກຄອງເຂດປົກຄອງຕົນເອງເຜົ່າຈວ້າງກວາງຊີຂອງຈີນທີ່ໄດ້ຖະແຫຼງຂ່າວໃນວັນທີ 22 ກຸມພານີ້ວ່າ, 5 ປີຕໍ່ໜ້ານີ້, ເຂດກວາງຊີຈະສຸມໃສ່ສ້າງເສັ້ນທາງເຊື່ອມຕໍ່ແລວທາງເສດຖະກິດເສັ້ນທາງສາຍໄໝແລະເສັ້ນທາງສາຍໄໝທາງທະເລສະຕະວັດທີ 21 ເພື່ອສ້າງໃຫ້ເປັນເສັ້ນທາງໃໝ່ທີ່ເຊື່ອມຕໍ່ເຂດພາກຕາເວັນຕົກຂອງຈີນແລະແຫຼມອິນດູຈີນກໍຄື "ໜຶ່ງແລວທາງໜຶ່ງເສັ້ນທາງ".
ນອກຈາກການເຊື່ອມໂຍງເຂົ້າກັນແລ້ວ, ເຂດກວາງຊີຍັງຈະຊຸກຍູ້ການຮ່ວມມືເພີ່ມຂີດຄວາມສາມາດການຜະລິດສາກົນຢ່າງຕັ້ງໜ້າທັງເປີດກວ້າງຂອບເຂດບໍລິການຂອງງານວາງສະແດງສິນຄ້າຈີນ-ອາຊຽນແລະກອງປະຊຸມສຸດຍອດການຄ້າການລົງທຶນຈີນ-ອາຊຽນ ໃຫ້ກ້າວສູ່ສາຍພົວພັນຄູ່ຮ່ວມມືເສດຖະກິດຮອບດ້ານຢູ່ພາກພື້ນ "10+6" ລວມທັງສາຍພົວພັນ "10+1" ລະຫວ່າງຈີນ-ອາຊຽນໃຫ້ກວ້າງຂວາງກວ່າເກົ່າ ເພື່ອສ້າງກົນໄກແລກປ່ຽນວັດທະນະທຳທີ່ມີຫຼາຍຝ່າຍເຂົ້າຮ່ວມເຊິ່ງກວມເອົາທັງເຈົ້າໜ້າທີ່ແລະປະຊາຊົນ ທັງເສີມຂະຫຍາຍບົດບາດຂອງຈຸດທົດລອງການປະຕິຮູບລວມດ້ານເສດຖະກິດຢູ່ເຂດຊາຍແດນຢ່າງເຕັມສ່ວນ ເພື່ອອອກແຮງພັດທະນາການເງິນລະຫວ່າງຊາຍແດນ, ການເງິນຂ້າມຊາຍແດນແລະອື່ນໆ.
 |
