ປະທານປະເທດຈີນເນັ້ນຮັບມືກັບບັນຫາປະຊາກອນທີ່ເຂົ້າສູ່ໄວຊະລາຢ່າງເລັ່ງດ່ວນແລະວິທະຍາສາດ

ຂ່າວສານຊິນຮວາລາຍງານວ່າ: ຫວ່າງມໍ່ໆນີ້, ທ່ານ ສິຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກ, ປະທານປະເທດ, ປະທານຄະນະກຳມະການການທະຫານສູນກາງຈີນ ໄດ້ຊີ້ນຳກ່ຽວກັບການເພີ່ມທະວີວຽກງານປະຊາກອນທີ່ເຂົ້າສູ່ໄວຊະລາໂດຍເນັ້ນວ່າ, ການຮັບມືຕໍ່ບັນຫາດັ່ງກ່າວຢ່າງມີປະສິດທິຜົນໄດ້ກ່ຽວຂ້ອງກັບການພັດທະນາລວມຂອງປະເທດແລະຄວາມຜາສຸກຂອງປະຊາຊົນຢ່າງຫຼວງຫຼາຍ ເຊິ່ງຕ້ອງຄົງຕົວໃນປັດຈຸບັນແລະຕ້ອງມີທັດສະນະເບິ່ງກວ້າງເຫັນໄກ, ເພີ່ມທະວີການວາງແຜນຢູ່ຂັ້ນເທິງ, ປັບປຸງນະໂຍບາຍແລະລະບຽບການທີ່ສຳຄັນໃຫ້ດີຂຶ້ນເຊັ່ນ: ການເກີດແລະລ້ຽງລູກ, ການປະກອບອາຊີບ, ການລ້ຽງໄວຊະລາແລະອື່ນໆ ເພື່ອຮັບມືກັບບັນຫາດັ່ງກ່າວຢ່າງເລັ່ງດ່ວນ, ມີວິທະຍາສາດແລະກວມລວມ ໂດຍວຽກງານດັ່ງກ່າວຕ້ອງຈັດເຂົ້າໃນວາລະກອງປະຊຸມທີ່ສຳຄັນແລະຕ້ອງວາງແຜນແລະຈັດຕັ້ງປະຕິບັດໃນໄລຍະ "ແຜນການພັດທະນາ 5 ປີຄັ້ງທີ 13" ເປັນຢາງດີ.

ທ່ານ ຫຼີເຄິ້ສຽງ ຄະນະປະຈຳກົມການເມືອງສູນກາງພັກ, ນາຍົກລັດຖະມົນຕີຈີນໄດ້ຊີ້ອອກວ່າ, ຕ້ອງຮັບມືກັບບັນຫາປະຊາກອນທີ່ເຂົ້າສູ່ໄວຊະລາໂດຍປິ່ນອ້ອມຫຼັກວິທະຍາສາດ ທັງປະສານສົມທົບກັບ "ແຜນການພັດທະນາ 5 ປີຄັ້ງທີ 13" ເພື່ອຄົ້ນຄວ້າທັງສະເໜີນະໂຍບາຍແລະຂໍ້ສະເໜີທີ່ກ່ຽວຂ້ອງໂດຍໄວພ້ອມດຽວກັນກໍຕ້ອງເອົາໃຈໃສ່ຄວາມເປັນໄປໄດ້ໃນການປະຕິບັດວຽກງານດັ່ງກ່າວ.