ຈີນຈະປະຕິບັດຕາມທັດສະນະການຕ່າງປະເທດຂອງປະເທດໃຫຍ່ທີ່ມີສີສັນພິເສດຂອງຈີນ
2016-03-05 14:57:10 cri
ວັນທີ 5 ມີນານີ້, ໃນໂອກາດກ່າວລາຍງານວຽກງານຂອງລັດຖະບານ, ທ່ານຫຼີເຄີ້ສຽງ ນາຍົກລັດຖະມົນຕີຈີນກ່າວວ່າ, ຈີນຈະສືບຕໍ່ຊູທຸງສັນຕິພາບ, ການພັດທະນາ, ການຮ່ວມມືແລະຕ່າງຝ່າຍຕ່າງໄດ້ຮັບຜົນປະໂຫຍດ, ປະຕິບັດຕາມທັດສະນະການຕ່າງປະເທດຂອງປະເທດໃຫຍ່ທີ່ມີສີສັນພິເສດຂອງຈີນ, ຊຸກຍູ້ການປະດິດສ້າງໃໝ່ແລະການເຕີບໂຕຂອງເສດຖະກິດໂລກ, ບູລະນະການຄຸ້ມຄອງເສດຖະກິດການທະນາຄານຂອງທົ່ວໂລກໃຫ້ສົມບູນ. ເພີ່ມທະວີການປະສານງານແລະການຮ່ວມມືກັບບັນດາປະເທດໃຫຍ່, ສ້າງການພົວພັນລະຫວ່າງປະເທດໃຫຍ່ໃຫ້ໄປມາຫາສູ່ກັນເປັນຢ່າງດີ, ຮ່ວມມືກັນບົນພື້ນຖານຕ່າງຝ່າຍຕ່າງໄດ້ຮັບຜົນປະໂຫຍດ. ປະຕິບັດຕາມທັດສະນະ ການຕ່າງປະເທດ ທີ່ສະໜິດສະໜົມ, ມີຄວາມຈິງໃຈ, ສ້າງຜົນປະໂຫຍດໃຫ້ແກ່ກັນ ແລະເຫັນອົກເຫັນໃຈ ກັບປະເທດອ້ອມຂ້າງ, ຢູ່ຮ່ວມກັນກັບປະເທດໃນພາກພື້ນຢ່າງສັນຕິໃນໄລຍະຍາວນານ, ຮ່ວມມືແລະເຊື່ອມໂຍງເຂົ້າກັນ ເພື່ອການພັດທະນາ. ລົງເລິກການຮ່ວມມືໃຕ້ໃຕ້, ເພື່ອຊຸກຍູ້ການພັດທະນາພ້ອມກັນ, ຮັກສາສິດແລະຜົນປະໂຫຍດຊອບທຳແລະຊອບດ້ວຍກົດໝາຍຂອງປະເທດທີ່ພວມພັດທະນາ. ເຂົ້າຮ່ວມແກ້ໄຂບັນຫາໃນທົ່ວໂລກແລະບັນຫາຈຸດຮ້ອນຢ່າງສ້າງສັນ, ຮ່ວມກັນກັບປະຊາຄົມໂລກ, ສ້າງຄວາມພະຍາຍາມຢ່າງບໍ່ຢຸດຢັ້ງເພື່ອພາລະກິດສັນຕິພາບແລະການພັດທະນາຂອງມວນມະນຸດ.
