ທ່ານຢີ້ກ່າງ ຮອງຜູ້ວ່າການທະນາຄານປະຊາຊົນຈີນ, ກຳມະການສະພາປຶກສາການເມືອງປະຊາຊົນແຫ່ງຊາດ ກ່າວໃນວັນທີ 6 ມີນານີ້ວ່າ: ທະນາຄານປະຊາຊົນຈີນໃນຖານະເປັນທະນາຄານກາງ ຈະເຮັດໃຫ້ອັດຕາແລກປ່ຽນລະຫວ່າງເງິນຢວນຈີນກັບເງິນສະກຸນຕ່າງໆຮັກສາຄວາມໝັ້ນທ່ຽງໂດຍພື້ນຖານ ແລະ ຈະບໍ່ໃຫ້ອ່ອນຄ່າລົງຢ່າງຕໍ່ເນື່ອງ.
ໃນງານຖະແຫຼງຂ່າວຂອງກອງປະຊຸມສະພາປຶກສາການເມືອງປະຊາຊົນແຫ່ງຊາດຄັ້ງທີ 4 ຊຸດທີ 12 ທີ່ຈັດຂຶ້ນໃນວັນທີ 6 ມີນານີ້, ທ່ານຢີ້ກ່າງ ກ່າວວ່າ: ເມື່ອເບິ່ງຈາກໄລຍະຍາວແລ້ວເຫັນວ່າ ຄາດວ່າອັດຕາແລກປ່ຽນຂອງເງິນຢວນຈະກັບຄືນສູ່ສະພາບທີ່ມີຄວາມໝັ້ນທ່ຽງໂດຍພື້ນຖານ ເຊິ່ງອີງໃສ່ຫຼັກຄ້ຳປະກັນ 3 ຂໍ້ຕົ້ນຕໍດັ່ງນີ້: ໜຶ່ງ, ເສດຖະກິດຈີນຮັກສາທ່າອ່ຽງການພັດທະນາໃນລະດັບສູງແລະປານກາງນັ້ນບໍ່ມີການປ່ຽນແປງແຕ່ຢ່າງໃດ, ສະມັດຕະພາບການຜະລິດຂອງແຮງງານ ແລະ ສະມັດຕະພາບການຜະລິດຂອງປັດໄຈຕ່າງໆຍັງເພີ່ມຂຶ້ນຢ່າງໜັກແໜ້ນ; ສອງ, ບັນຊີກະແສລາຍວັນ ໂດຍສະເພາະແມ່ນສິນຄ້າຂອງຈີນຍັງໄດ້ປຽບດຸນການຄ້າເປັນຈຳນວນຫຼວງຫຼາຍ, ການລົງທຶນໂດຍກົງຕໍ່ພາຍນອກ ແລະ ການລົງທຶນໂດຍກົງຈາກພາຍນອກລ້ວນແຕ່ເພີ່ມຂຶ້ນຢ່າງແຂງແຮງ; ແລະສາມ, ຄັງສຳຮອງສະກຸນເງິນຕາຕ່າງປະເທດຍັງມີຢ່າງຫຼວງຫຼາຍ.
ທ່ານຢີ້ກ່າງ ກ່າວຕື່ມວ່າ: ຄັງສຳຮອງສະກຸນເງິນຕາຕ່າງປະເທດຂອງຈີນແມ່ນຄຸ້ມຄອງຕາມຫຼັກການໄຫຼວຽນ, ປອດໄພ ແລະ ໄດ້ຜົນກຳໄລ ທັງຈະຮັກສາໃນລະດັບທີ່ສົມເຫດສົມຜົນ.
