ກອງປະຊຸມຄົບຄະນະຂອງຄະນະຜູ້ແທນເຂດກວາງຊີ່ທີ່ເຂົ້າຮ່ວມກອງປະຊຸມສະພາປະຊາຊົນແຫ່ງຊາດຄັ້ງທີ 4 ຊຸດທີ 12 ໄດ້ເປີດເຜີຍຕໍ່ສື່ມວນຊົນໃນວັນທີ 8 ມີນານີ້ ໂດຍທ່ານຊ່ຽວຢິງຈື ຜູ້ແທນສະພາປະຊາຊົນແຫ່ງຊາດ, ເລຂາຄະນະພັກເມືອງຊິ່ນໂຈ່ວເຂດກວາງຊີ່ ໄດ້ໃຫ້ສຳພາດຕໍ່ນັກຂ່າວໃນວັນດັ່ງກ່າວວ່າ: ປີນີ້ຈະມີ 50 ກວ່າວິສາຫະກິດເຂົ້າດຳເນີນທຸລະກິດຢູ່ເຂດນິຄົມອຸດສາຫະກຳຊິ່ນໂຈ່ວຈີນ-ມາເລເຊຍ ແລະໃນໄລຍະປະຕິບັດແຜນພັດທະນາ 5 ປີຄັ້ງທີ 13 ນີ້, ມູນຄ່າການຜະລິດຂອງເຂດນິຄົມອຸດສາຫະກຳດັ່ງກ່າວຈະລື່ນ 50 ຕື້ຢວນ, ຂະນະທີ່ຜະລິດຕະພັນສິນຄ້າຮັງນົກຂອງມາເລເຊຍອາດຈະສົ່ງມາຈີນ.
ເຂດນິຄົມອຸດສາຫະກຳຊິ່ນໂຈ່ວຈີນ-ມາເລເຊຍໄດ້ສ້າງຂຶ້ນຢ່າງເປັນທາງການເມື່ອປີ 2012, ຂະນະທີ່ເຂດນິຄົມອຸດສາຫະກຳກວນຕານມາເລເຊຍ-ຈີນກໍໄດ້ສ້າງຮູບແບບ ໃໝ່ການຮ່ວມມືເຂດນິຄົມສາກົນເປັນ "ສອງປະເທດສອງເຂດນິຄົມ".
ເມືອງຊິ່ນໂຈ່ວ ຕັ້ງຢູ່ພາກໃຕ້ຂອງເຂດກວາງຊີ່ ເຊິ່ງເສດຖະກິດທ່າເຮືອໄດ້ຮັບການພັດທະນາສົມຄວນ ແລະແມ່ນໜຶ່ງໃນຊ່ອງທາງອອກສູ່ທະເລທີ່ສະດວກກວ່າໝູ່ຢູ່ພາກຕາເວັນຕົກສຽງໃຕ້ຂອງຈີນ. ປີຜ່ານມາ, ລະບຽບການອອກວິຊາແລະອື່ນໆໃນເຂດນິຄົມດັ່ງກ່າວກະທັດຮັດງ່າຍຂຶ້ນກວ່າເກົ່າ ເພື່ອອຳນວຍຄວາມສະດວກໃຫ້ແກ່ການພົວພັນດ້ານການຄ້າ ແລະໃນປີນີ້ຈະສ້າງເປັນຈຸດທົດລອງການຊື້ຂາຍເງິນຕາຕ່າງປະເທດກັບທະນາຄານຕາມເຈດຈຳນົງຂອງນັກທຸລະກິດ, ເພື່ອເຮັດໃຫ້ເງິນກູ້ສະກຸນເງິນຢວນຢູ່ຕ່າງປະເທດໄຫຼກັບຄືນ ແລະອື່ນໆ.