ວັນທີ 13 ມີນານີ້, ໃນເວລາເຂົ້າຮ່ວມກອງປະຊຸມຄັ້ງທີ 4 ຂອງສະພາປະຊາຊົນແຫ່ງຊາດຊຸດທີ 12, ທ່ານ ກ່າວຫູເສີງ ລັດຖະມົນຕີວ່າການກະຊວງການຄ້າຈີນກ່າວວ່າ: ຈີນຈະຜ່ອນຄາຍຄວາມຈຳກັດໂດຍໃຫ້ວິສາຫະກິດຕ່າງປະເທດເຂົ້າມາລົງທຶນໃນຂົງເຂດຕ່າງໆ, ໂດຍສະເພາະຈະເປີດປະຕູຕື່ມອີກໃນຂົງເຂດການບໍລິການຕ່າງໆເຊັ່ນ: ເຕັກໂນໂລຊີ, ການເງິນ, ການສຶກສາ, ວັດທະນະທຳແລະການຈໍລະຈອນສິນຄ້າ, ພ້ອມທັງຄົ້ນຄວ້າແລະຜ່ອນຄາຍຄວາມຈຳກັດໃຫ້ທຶນຕ່າງປະເທດເຂົ້າໃນຂະແໜງການຜະລິດທີ່ມີເຕັກໂນໂລຢີກ້າວໜ້າທັນສະໄໝແລະມີມູນຄ່າເພີ່ມໃນລະດັບສູງ, ສົ່ງເສີມໃຫ້ວິສາຫະກິດຕ່າງປະເທດເຂົ້າຮ່ວມການປັບປຸງ, ການຍົກລະດັບແລະຫັນປ່ຽນຮູບແບບແລະການພັດທະນາດ້ວຍການປະດິດສ້າງຂອງລັດວິສາຫະກິດ.
ທ່ານ ກ່າວຫູເສີງ ກ່າວຕື່ມວ່າ: ການເປີດກວ້າງການນຳໃຊ້ທຶນຕ່າງປະເທດແມ່ນຂົງເຂດທີ່ສຳຄັນອັນໜຶ່ງໃນການເປີດກວ້າງການໄຂປະຕູສູ່ພາຍນອກຂອງຈີນ. ໃນຂັ້ນຕອນຕໍ່ໄປ, ຈີນຈະປັບປຸງການນຳໃຊ້ທຶນຕ່າງປະເທດເຂົ້າໃນຂະແໜງການຕ່າງໆໃຫ້ດີຂຶ້ນຕື່ມອີກ. ຄຽງຄູ່ກັບການຈັດຕັ້ງປະຕິບັດແລະຊຸກຍູ້ຂໍ້ລິເລີ່ມ "ໜຶ່ງແລວທາງ ໜຶ່ງເສັ້ນທາງ", ເຂດພາກກາງແລະພາກຕາເວັນຕົກ,ເຂດຊາຍແດນແລະເຂດແຄມຝັ່ງແມ່ນ້ຳຂອງຈີນລ້ວນແຕ່ໄດ້ກາຍເປັນແນວໜ້າໃໝ່ຂອງການໄຂປະຕູສູ່ພາຍນອກ, ທັງມີຄວາມສາມາດບົ່ມຊ້ອນອັນໃຫຍ່ຫຼວງ. ທ່ານ ກ່າວຫູເສີງ ກ່າວຕໍ່ໄປວ່າ: "ພວກຂ້າພະເຈົ້າພວມເລັ່ງລັດຄົ້ນຄວ້າແລະວາງສາລະບານຊີ້ນຳກ່ຽວກັບຂະແໜງການທີ່ມີທ່າແຮງຢູ່ພາກກາງແລະພາກຕາເວັນຕົກຂອງຈີນສຳລັບການລົງທຶນຂອງວິສາຫະກິດຕ່າງປະເທດສະບັບໃໝ່, ເພື່ອຜ່ອນຄາຍຄວາມຈຳກັດໃຫ້ທຶນຕ່າງປະເທດເຂົ້າໃນຕະຫຼາດເຂດພາກກາງແລະພາກຕາເວັນຕົກຂອງຈີນ."
 |
