ທ່ານ ຫວູຈື້ມິງ ກຳມະການສະພາປຶກສາການເມືອງປະຊາຊົນແຫ່ງຊາດຈີນ, ກຳມະການສູນກາງຂອງຄະນະກຳມະການສ້າງສາປະເທດ ປະຊາທິປະໄຕຂອງຈີນກ່າວໃນເວລາໃຫ້ສຳພາດຕໍ່ນັກຂ່າວວ່າ: ການສ້າງ "ໜຶ່ງແລວທາງ ໜຶ່ງເສັ້ນທາງ" ແມ່ນໂອກາດທີ່ສຳຄັນແລະໃຫຍ່ຫຼວງສຳລັບເສດຖະກິດແລະນັກທຸລະກິດຂອງໄຕ້ຫວັນ, ການເຂົ້າຮ່ວມ "ໜຶ່ງແລວທາງ ໜຶ່ງເສັ້ນທາງ" ຈະສາມາດຊ່ວຍໜູນການພັດທະນາເສດຖະກິດຂອງໄຕ້ຫວັນ.
ທ່ານ ຫວູຈື້ມິງ ກ່າວວ່າ: ໄຕ້ຫວັນຜ່ານການເຂົ້າຮ່ວມຂໍ້ລິເລີ່ມ "ໜຶ່ງແລວທາງ ໜຶ່ງເສັ້ນທາງ" ທີ່ແຜ່ນດິນໃຫຍ່ຈີນສະເໜີອອກຢ່າງຕັ້ງໜ້າ, ຈະສາມາດຊ່ວຍໄຕ້ຫວັນເລັ່ງລັດການເຂົ້າຮ່ວມເສດຖະກິດພາກພື້ນ, ແລະຂະຫຍາຍໂອກາດການຄ້າໄປສູ່ອາຊຽນ, ອາຊີຕາເວັນອອກສຽງໃຕ້ແລະເອີຣົບ. ວິສາຫະກິດຂອງສອງຝັ່ງຊ່ອງແຄບໄຕ້ຫວັນສາມາດລົງເລິກການຮ່ວມມືໃນການສ້າງ"ໜຶ່ງແລວທາງ ໜຶ່ງເສັ້ນທາງ", ບັນລຸການປັບປຸງແລະຈັດວາງຊັບພະຍາກອນຂອງສອງຝັ່ງໃຫ້ດີຂຶ້ນ, ພ້ອມກັນຍົກຄວາມສາມາດການແຂ່ງຂັນຂອງຊົນຊາດຈີນຢູ່ໃນໂລກໃຫ້ສູງຂຶ້ນ.
ທ່ານ ຫວູຈື້ມິງ ກ່າວຕື່ມວ່າ: ໄຕ້ຫວັນກັບແຂວງຟູຈ້ຽນທີ່ເປັນເຂດໃຈກາງ "ເສັ້ນທາງສາຍໄໝທາງທະເລ" ຢູ່ເຊິ່ງໜ້າກັນຕາມແຄມຝັ່ງທະເລ, ໂດຍອີງອາໄສ "ໜຶ່ງແລວທາງ ໜຶ່ງເສັ້ນທາງ", ວິສາຫະກິດໄຕ້ຫວັນແລະແຂວງຟູຈ້ຽນສາມາດຮ່ວມມືກັນພັດທະນາຕະຫຼາດອາຊີຕາເວັນອອກສຽງໃຕ້ກໍຄືຕະຫຼາດອາຊີປາຊີຟິກ.
 |
