ກອງປະຊຸມຜູ້ນຳຂອງກົນໄກຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄັ້ງທຳອິດທີ່ຈະໄຂຂຶ້ນຢູ່ແຂວງໄຫຫຼຳຂອງຈີນໃນທ້າຍເດືອນມີນານີ້ນັ້ນ, ທ່ານໂດທຽນຊາມ ອະດີດຫົວໜ້າສະຖາບັນຄົ້ນຄວ້າຈີນຂອງສະພາບັນດິດວິທະຍາສາດເຕັກນິກຫວຽດນາມ, ທັງເປັນບັນນາທິການໃຫຍ່ "ບົດວິຈານກ່ຽວກັບການຄົ້ນຄວ້າຈີນ"ເຫັນວ່າ, ການຮ່ວມມືຕາມແມ່ນ້ຳລ້ານຊ້າງ-ແມ່ນ້ຳຂອງໄດ້ຊຸກຍູ້ການຮ່ວມມືແລະຄວາມເຂົ້າໃຈກັນລະຫວ່າງ 6 ປະເທດໃນພາກພື້ນນີ້.
ທ່ານໂດທຽນຊາມກ່າວວ່າ, ການຈັດຕັ້ງປະຕິບັດເນື້ອໃນທຸກຂໍ້ຂອງກົນໄກຮ່ວມມືຕາມແມ່ນ້ຳລ້ານຊ້າງ-ແມ່ນ້ຳຂອງຢ່າງມີປະສິດທິຜົນນັ້ນ ບໍ່ພຽງແຕ່ເຮັດໃຫ້ການຄົມມະນາຄົມ ທາງນ້ຳຢູ່ຍ່ານໃຕ້ແລະເໜືອໃນເຂດແມ່ນ້ຳລ້ານຊ້າງ-ແມ່ນ້ຳຂອງຄ່ອງໂຕໄດ້ເທົ່ານັ້ນ, ຫາກຍັງສາມາດເສີມຂະຫຍາຍບົດບາດຊຸກຍູ້ຕໍ່ການປັບປຸງທາງຫຼວງ, ການບິນ, ທ່າເຮືອແລະພື້ນຖານໂຄງລ່າງອື່ນໆຢູ່ເຂດອ້ອມຂ້າງຍ່ານເໜືອ ຄືທົ່ງພຽງຮົງໂຮແລະທົ່ງພຽງຈີວລັງ, ລວມທັງກະຕຸ້ນເຖິງການສັນຈອນການລຳລຽງແລະການພັດທະນາການຄ້າຢູ່ພາກພື້ນນີ້, ປະຕິບັດຂໍ້ລິເລີ່ມ"ໜຶ່ງແລວທາງໜຶ່ງເສັ້ນທາງ"ຂອງຈີນ ແລະແຜນການ"ສອງລະບຽງໜຶ່ງວົງ" ຂອງຫວຽດນາມໃຫ້ເຊື່ອມໂຍງເຂົ້າກັນຢ່າງເປັນຮູບປະທຳ.
ທ່ານໂດທຽນຊາມເຫັນວ່າ, ການຮ່ວມມືໃນຂົງເຂດສັງຄົມແລະວັດທະນະທຳໃນການຮ່ວມມືຕາມແມ່ນ້ຳລ້ານຊ້າງ-ແມ່ນ້ຳຂອງແມ່ນສິ່ງຈຳເປັນທີ່ສຸດ, ເພາະຢູ່ເຂດຕາມລ້ອງແມ່ນ້ຳລ້ານຊ້າງ-ແມ່ນ້ຳຂອງ ມີຊົນເຜົ່າສ່ວນໜ້ອຍຫຼາຍ, ການນັບຖືປະເພນີວັດທະນະທຳຂອງຊົນເຜົ່າໃນທຸກເຂດ, ແລະການເອົາວັດທະນະທຳທີ່ມີຫຼາຍສີສັນໃຫ້ເຊື່ອມໂຍງເຂົ້າການຮ່ວມມື ຈະເປັນຜົນດີຕໍ່ການເພີ່ມທະວີຄວາມເຂົ້າໃຈກັນແລະຄວາມໄວ້ເນື້ອເຊື່ອໃຈກັນລະຫວ່າງເຂດຍ່ານເໜືອແລະໃຕ້ຫຼາຍກວ່າເກົ່າ.
 |
