ພາຍຫຼັງປະຕິບັດໜ້າທີ່ຕາມວາລະວຽກຕ່າງໆດ້ວຍຄວາມຮັບຜິດຊອບສູງ, ກອງປະຊຸມສະພາປະຊາຊົນແຫ່ງຊາດຈີນຄັ້ງທີ 4 ຊຸດທີ 12 ໄດ້ອັດລົງແລ້ວຢູ່ຫໍສະພາປະຊາຊົນຈີນນະຄອນຫຼວງປັກກິ່ງໃນຕອນເຊົ້າວັນທີ 16 ມີນານີ້ ໂດຍກອງປະຊຸມໄດ້ຮັບຮອງເອົາບົດລາຍງານວຽກງານຂອງລັດຖະບານ, ແຜນແມ່ບົດ "ແຜນພັດທະນາ 5 ປີຄັ້ງທີ 13", ບົດລາຍງານວຽກງານຂອງຄະນະປະຈຳສະພາປະຊາຊົນແຫ່ງຊາດຈີນເປັນຕົ້ນ. ນອກນີ້, ກອງປະຊຸມຍັງໄດ້ຮັບຮອງເອົາກົດໝາຍວ່າດ້ວຍການກຸສົນ ໂດຍທ່ານສີຈິ້ນຜິງ ປະທານປະເທດຈີນໄດ້ລົງນາມໃນດຳລັດປະທານປະເທດເລກທີ 43 ແລະປະກາດໃຊ້ກົດໝາຍດັ່ງກ່າວ.
ກອງປະຊຸມໄດ້ລົງຄະແນນສຽງຮັບຮອງເອົາມະຕິ 7 ສະບັບກ່ຽວກັບບົດລາຍງານວຽກງານຂອງລັດຖະບານ, ແຜນແມ່ບົດຂອງແຜນພັດທະນາເສດຖະກິດ-ສັງຄົມ 5 ປີຄັ້ງທີ 13, ການຈັດຕັ້ງຕັ້ງປະຕິບັດແຜນພັດທະນາເສດຖະກິດ-ສັງຄົມປີ 2015 ແລະ ແຜນພັດທະນາເສດຖະກິດ-ສັງຄົມປີ 2016, ການຈັດຕັ້ງປະຕິບັດແຜນງົບປະມານຂັ້ນສູນກາງແລະຂັ້ນທ້ອງຖິ່ນປີ 2015 ແລະ ແຜນງົບປະມານສູນກາງແລະທ້ອງຖິ່ນປີ 2016, ບົດລາຍງານວຽກງານຂອງຄະນະປະຈຳສະພາປະຊາຊົນແຫ່ງຊາດຈີນ, ບົດລາຍງານວຽກງານຂອງສານປະຊາຊົນສູງສຸດ ແລະ ບົດລາຍງານຂອງອົງການໄອຍະການປະຊາຊົນສູງສຸດ. ນອກນີ້, ກອງປະຊຸມຍັງໄດ້ຮັບຮອງເອົາກົດໝາຍວ່າດ້ວຍການກຸສົນ ແລະມະຕິຕົກລົງຂອງຄະນະປະຈຳສະພາປະຊາຊົນແຫ່ງຊາດວ່າດ້ວຍການເຫັນດີໃຫ້ທ່ານຫວງເຣີ້ນຊິ່ວ ລາອອກຈາກຕຳແໜ່ງກຳມະການຄະນະປະຈຳສະພາປະຊາຊົນແຫ່ງຊາດຊຸດທີ 12.
