ທ່ານລູ້ຄ່າງ ໂຄສົກກະຊວງການຕ່າງປະເທດຈີນ ກ່າວໃນວັນທີ 15 ມີນານີ້ວ່າ: ນັບແຕ່ວັນທີ 15 ມີນານີ້ຈົນຮອດວັນທີ 10 ເມສາໜ້ານີ້, ຈີນຈະໃຊ້ມາດຕະການຢ່າງຮີບດ່ວນ ລະບາຍນ້ຳລົງໃຕ້ໃຫ້ຫຼາຍຂຶ້ນ ໂດຍຜ່ານເຂື່ອນໄຟຟ້ານ້ຳຕົກຊຽງຮຸ່ງ ເພື່ອຫຼຸດຜ່ອນສະຖານະການໄພແລ້ງທີ່ເກີດຂຶ້ນຢູ່ບັນດາປະເທດລຸ່ມແມ່ນ້ຳຂອງ.
ສື່ມວນຊົນລາຍງານວ່າ: ປັດຈຸບັນ, ຫວຽດນາມພວມເກີດໄພແລ້ງຢ່າງໜັກໜ່ວງທີ່ສຸດໃນຮອບເກືອບໜຶ່ງສະຕະວັດ ສົ່ງຜົນໃຫ້ການຜະລິດກະສິກຳຢູ່ເຂດສາມຫຼ່ຽມປາກແມ່ນ້ຳຂອງຖືກກະທົບຢ່າງໜັກໜ່ວງ. ກ່ອນໜ້ານີ້, ຫວຽດນາມໄດ້ຮ້ອງຂໍຈີນ ໂດຍໃຫ້ປ່ອຍນ້ຳຢູ່ເຂື່ອນໄຟຟ້ານ້ຳຕົກຊຽງຮຸ່ງ ແຂວງຢຸນນານ ລົງໃຕ້ ເພື່ອຫຼຸດຜ່ອນຜົນກະທົບຈາກໄພແລ້ງຂອງທົ່ງພຽງເຂດດັ່ງກ່າວ. ຕໍ່ກໍລະນີນີ້, ທ່ານລູ້ຄ່າງ ໂຄສົກກະຊວງການຕ່າງປະເທດຈີນ ໄດ້ກ່າວໃນກອງປະຊຸມຂ່າວວ່າ: ດ້ວຍຄວາມເປັນຫ່ວງເປັນໃຍຕໍ່ປະເທດລຸ່ມແມ່ນ້ຳຂອງນັ້ນ, ລັດຖະບານຈີນຕົກລົງໃຫ້ປ່ອຍນ້ຳຢູ່ເຂື່ອນໄຟຟ້ານ້ຳຕົກຊຽງຮຸ່ງລົງໃຕ້ໃຫ້ຫຼາຍຂຶ້ນແຕ່ວັນທີ 15 ມີນານີ້ຫາວັນທີ 10 ເມສາໜ້ານີ້ ເຊິ່ງຈະເປັນການຫຼຸດຜ່ອນຜົນກະທົບຈາກໄພແລ້ງຢູ່ລາວ, ມຽນມາ, ໄທ, ກຳປູເຈຍ ແລະ ຫວຽດນາມ ເປັນຕົ້ນ ແລະຫວັງວ່າມາດຕະການດັ່ງກ່າວຈະສາມາດຊ່ວຍຫຼຸດຜ່ອນສະຖານະການດັ່ງກ່າວໄດ້ເປັນຢ່າງດີ.
