ຕາມຂ່າວສານຊິນຮວາ: ວັນທີ 16 ມີນານີ້, ກະຊວງການຕ່າງປະເທດແລະການຮ່ວມມືສາກົນກຳປູເຈຍໄດ້ອອກຖະແຫຼງການ ສະແດງຄວາມຊົມເຊີຍຕໍ່ລັດຖະບານຈີນທີ່ປ່ອຍນ້ຳສູ່ຍ່ານໃຕ້ແມ່ນ້ຳຂອງຢ່າງຮີບດ່ວນເພື່ອຊ່ວຍປະເທດຢູ່ຕາມລຸ່ມແມ່ນ້ຳຂອງແກ້ໄຂໄພແລ້ງ.
ຖະແຫຼງການຂຽນວ່າ, ການຮ່ວມມືຄຸ້ມຄອງຊັບພະຍາກອນນ້ຳ ແມ່ນພາກສ່ວນສຳຄັນຂອງກົນໄກຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ, ຂໍ້ຕົກລົງປ່ອຍນ້ຳຢ່າງຮີບດ່ວນຂອງຈີນໄດ້ຢັ້ງຢືນໃຫ້ເຫັນອີກເທື່ອໜຶ່ງວ່າ, ປະເທດຢູ່ລຸ່ມແມ່ນ້ຳຂອງມີການພົວພັນຮ່ວມມືທີ່ດີກັບສປຈີນໃນການຄຸ້ມຄອງຊັບພະຍາກອນນ້ຳ.
ນັບແຕ່ທ້າຍປີ 2015 ເປັນຕົ້ນມາ, ຍ້ອນວ່າໄດ້ຮັບຜົນສະທ້ອນຈາກປາກົດການເອນີໂນທີ່ຮຸນແຮງ, ປະເທດຕ່າງໆຢູ່ຕາມລຸ່ມແມ່ນ້ຳລ້ານຊ້າງ-ແມ່ນ້ຳຂອງ ໄດ້ປະສົບໄພແລ້ງໃນລະດັບຕ່າງກັນ ແລະໃນໄລຍະມໍ່ໆມານີ້, ສະພາບດັ່ງກ່າວໄດ້ໜັກໜ່ວງຂຶ້ນຕື່ມ ໂດຍໄດ້ສົ່ງຜົນສະທ້ອນຕໍ່ການຜະລິດແລະ ການດຳລົງຊີວິດຂອງປະຊາຊົນປະເທດຕ່າງໆຢູ່ລຽບຕາມນ້ຳຂອງ.
 |
