ຕາມຂ່າວສານຊິນຮວາ: ວັນທີ 17 ມີນານີ້, ກະຊວງການຕ່າງປະເທດຈີນ ໄດ້ຈັດກອງປະຊຸມຂ່າວຕໍ່ນັກຂ່າວຈີນແລະຕ່າງປະເທດກ່ຽວກັບກອງປະຊຸມຜູ້ນຳຄັ້ງທຳອິດຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ, ທ່ານ ລິວເຈີ້ນມິນ ລັດຖະມົນຕີຊ່ວຍວ່າການກະຊວງການຕ່າງປະເທດຈີນ ໄດ້ແນະນຳສະພາບການທີ່ກ່ຽວຂ້ອງ ພ້ອມທັງໄດ້ຕອບຄຳຖາມຂອງນັກຂ່າວ.
ທ່ານ ລິວເຈີ້ນມິນ ໃຫ້ຮູ້ວ່າ, ຜູ້ນຳຂອງ 6 ປະເທດຈະເປັນສັກຂີພິຍານໃຫ້ແກ່ພິທີເລີ່ມດຳເນີນການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ແລະຈະຮ່ວມກັນຊົມງານວາງສະແດງການຮ່ວມມືລະຫວ່າງປະເທດຢູ່ລຽບຕາມແມ່ນ້ຳລ້ານຊ້າງ-ແມ່ນ້ຳຂອງ ຂະນະທີ່ຜູ້ນຳຂອງຈີນແລະໄທຈະເປັນປະທານຮ່ວມກອງປະຊຸມ ແລະຈະໃຫ້ສຳພາດຕໍ່ນັກຂ່າວຮ່ວມກັນ. ນອກນັ້ນ, ທ່ານ ຫຼີເຄີ້ສຽງ ນາຍົກ ລັດຖະມົນຕີຈີນ ຍັງຈະຈັດການພົບປະສອງຝ່າຍກັບຜູ້ນຳ 5 ປະເທດ.
ທ່ານ ລິວເຈີ້ນມິນ ກ່າວຕື່ມວ່າ, ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ແມ່ນຄວາມພະຍາຍາມທີ່ສຳຄັນຂອງ 6 ປະເທດໃກ້ຄຽງທີ່ມີໄມຕີຈິດມິດຕະພາບສະໜິດແໜ້ນເພື່ອຊອກຄົ້ນການສ້າງຕັ້ງເວທີການຮ່ວມມືຢູ່ພາກພື້ນແບບໃໝ່, ເຊື່ອໝັ້ນວ່າ ກອງປະຊຸມຜູ້ນຳຄັ້ງທຳອິດຈະໄດ້ຮັບໝາກຜົນທີ່ດີ ແລະນຳເອົາຜົນປະໂຫຍດຕົວຈິງມາໃຫ້ແກ່ປະຊາຊົນຂອງປະເທດໃນພາກພື້ນນີ້.
 |
