ຫວ່າງມໍ່ໆມານີ້, ຮອງ CEO ຂອງທະນາຄານກະສິກອນໄທ ໄດ້ໃຫ້ສຳພາດຕໍ່ນັກຂ່າວວ່າ, ເຂດແມ່ນ້ຳລ້ານຊ້າງ-ແມ່ນ້ຳຂອງມີສາຍພູ ແລະ ແມ່ນ້ຳລຳເຊຕິດຈອດກັນ, ມີການພົວພັນດ້ານວັດທະນະທຳທີ່ແໜ້ນແຟ້ນ, ມີພື້ນຖານການຮ່ວມມືອັນໜັກແໜ້ນ, ຂົງເຂດການຮ່ວມມືກວ້າງໃຫຍ່ ທັງມີຄວາມສາມາດບົ່ມຊ້ອນຢ່າງມະຫາສານ. ກົນໄກຮ່ວມມືລະຫວ່າງຈີນແລະປະເທດລຸ່ມແມ່ນ້ຳຂອງ ຈະມີຜົນດີຕໍ່ການເພີ່ມທະວີຄວາມໄວ້ເນື້ອເຊື່ອໃຈກັນທາງດ້ານການເມືອງ, ຊຸກຍູ້ການຮ່ວມມືທີ່ແທ້ຈິງ, ເພີ່ມຄວາມເຂົ້າໃຈກັນ ແລະ ຕ່າງຝ່າຍຕ່າງມີຜົນປະໂຫຍດ ລະຫວ່າງປະເທດທີ່ກ່ຽວຂ້ອງ.
ຮອງ CEO ທ່ານນີ້ຊີ້ອອກວ່າ: ກອງປະຊຸມລັດຖະມົນຕີຕ່າງປະເທດຄັ້ງທຳອິດຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ທີ່ຈັດຂຶ້ນຢ່າງສຳເລັດຜົນຢູ່ແຂວງຢຸນນານປະເທດຈີນເມື່ອເດືອນພະຈິກປີ 2015 ນັ້ນ ເປັນການເລີ່ມຕົ້ນຂະບວນການຮ່ວມມືຢ່າງເປັນທາງການ ເຊິ່ງປັດຈຸບັນ, ທັງ 6 ປະເທດ ຄື ຈີນ, ລາວ, ໄທ, ມຽນມາ, ຫວຽດນາມ ແລະ ກຳປູເຈຍ ໄດ້ບັນລຸທັດສະນະທີ່ເປັນເອກະສັນກັນຢ່າງກວ້າງຂວາງກ່ຽວກັບກົນໄກຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ, ຂະນະທີ່ 6 ປະເທດດັ່ງກ່າວສາມາດເພີ່ມທະວີຄວາມສາມາດແກ້ງແຍ້ງກັນໃນຕະຫຼາດຂອງກັນແລະກັນ ໂດຍຜ່ານກົນໄກຮ່ວມມືດັ່ງກ່າວ ແລະກໍມີຜົນດີຕໍ່ການຊຸກຍູ້ການພັດທະນາເສດຖະກິດຂອງລາວ, ມຽນມາ, ກຳປູເຈຍ ແລະ ຫວຽດນາມ ທັງຊຸກຍູ້ໃຫ້ 4 ປະເທດນີ້ເຊື່ອມໂຍງເຂົ້າໃນປະຊາຄົມເສດຖະກິດອາຊຽນເປັນຢ່າງດີ.
ທ່ານກ່າວຕື່ມວ່າ: ກອງປະຊຸມຜູ້ນຳຄັ້ງທຳອິດຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຈະຊຸກຍູ້ການຮ່ວມມືໃນພາກພື້ນນີ້ໃຫ້ມີການພັດທະນາກ້າວໜ້າຕື່ມອີກ ແລະສ້າງຄວາມສົມບູນພູນສຸກໃຫ້ແກ່ 10 ປະເທດອາຊຽນດ້ວຍການຮ່ວມມືຕໍ່ເນື່ອງຖາວອນ.
