ຕາມຂ່າວ CRI: ວັນທີ 22 ມີນານີ້, "ກອງປະຊຸມໂຕະມົນຜູ້ນຳສື່ມວນຊົນ" ຂອງກອງປະຊຸມປີ 2016 ໃນເວທີປຶກສາຫາລືອາຊີໂປອາວໄດ້ຈັດຂຶ້ນຢູ່ສູນປະຊຸມສາກົນໂປອາວ, ໂດຍສື່ມວນຊົນຈາກ 11 ປະເທດຄືຈີນ, ລາວ, ຕວກກີ, ກຳປູເຈຍ, ມົງໂກເລຍ, ເນປານ, ອິນໂດເນເຊຍ, ສ.ເກົາຫຼີແລະອື່ນໆໄດ້ຫາລືແລະແລກປ່ຽນໃນຫົວຂໍ້ "ໂອກາດໃໝ່ແຫ່ງການຮ່ວມມືລະຫວ່າງສື່ມວນຊົນອາຊີ".ຂະນະທີ່ທ່ານ ດວງຈິດສະຫວັດບຸນມີ ບັນນາທິການໃຫຍ່ໜັງສືພິມປະຊາຊົນໄດ້ຮຽກຮ້ອງໃຫ້ເພີ່ມທະວີການແລກປ່ຽນຮ່ວມມືລະຫວ່າງສື່ຕ່າງໆວ່າ:
ສຳລັບຂ້າພະເຈົ້າທີ່ເຮັດວຽກຢູ່ໜັງສືພິມເຫັນວ່າ, ໃນຍຸກ new media , ໜັງສືພິມທີ່ເຮັດດ້ວຍເຈ້ຍໄດ້ຮັບຜົນກະທົບຫຼາຍ. ເພື່ອແກ້ໄຂບັນຫານີ້ ຄວາມເຫັນຂອງຂ້າພະເຈົ້າເຫັນວ່າຄວນມີການຮ່ວມມືກັນຢ່າງແໜ້ນແຟ້ນ ແລະ ການແລກປ່ຽນຂໍ້ມູນຂ່າວສານ. ນອກນັ້ນ, ກ່ຽວກັບການຊ່ວຍເຫຼືອປະເທດທີ່ທຸກຍາກຄວນມີການຝຶກອົບຮົມນັກຂ່າວ. ຂ້າພະເຈົ້າສະໜັບສະໜູນແນວຄວາມຄິດໃນກອງປະຊຸມນີ້ທີ່ຢາກໃຫ້ສ້າງຕັ້ງອົງການກ່ຽວກັບສື່ມວນຊົນ, ອັນນີ້ເປັນແນວຄິດທີ່ດີ, ເພື່ອເຮັດໃຫ້ສື່ມວນຊົນເກົ່າ ຄືໜັງສືພິມທີ່ເຮັດດ້ວຍເຈ້ຍສາມາດຄົງຕົວ ແລະ ຂະຫຍາຍຕົວໄດ້. ພວກເຮົາກໍ່ໄດ້ປັບປຸງຕົນເອງທາງດ້ານເນື້ອໃນ ເຮັດໃຫ້ໄວຂຶ້ນກວ່າເກົ່າ,ພວກເຮົາກໍ່ຮ່ວມມືກັບບັນດາໜັງສືພິມສະມາຊິກອາຊຽນ ລວມທັງຂອງສ.ປ.ຈີນ ກໍຄືCRI ເພື່ອແລກປ່ຽນຂໍ້ມູນຂ່າວສານນຳກັນ.
