ຕອນບ່າຍວັນທີ 23 ມີນານີ້ ຢູ່ເມືອງຊ່ານຢ້າແຂວງໄຫຫຼຳຂອງຈີນ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນໄດ້ພົບປະກັບທ່ານ ໄຊມົກຄຳ ຮອງປະທານາທິບໍດີມຽນມາທີ່ໄດ້ຕາງໜ້າທ່ານ ເທັນເຊັນ ປະທານາທິບໍດີມຽນມາມາຈີນເຂົ້າຮ່ວມກອງປະຊຸມຜູ້ນຳຄັ້ງທຳອິດການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງແລະກອງປະຊຸມປະຈຳປີຂອງເວທີປຶກສາຫາລືອາຊີໂປອາວ 2016.
ທ່ານ ຫຼີເຄີ້ສຽງ ກ່າວວ່າ: ຈີນແລະມຽນມາແມ່ນປະເທດບ້ານໃກ້ເຮືອນຄຽງທີ່ດີ. ຈີນເຄົາລົບຄວາມເປັນເຈົ້າຂອງປະຊາຊົນມຽນມາໃນການເລືອກເສັ້ນທາງແຫ່ງການພັດທະນາທີ່ສອດຄ່ອງກັບສະພາບຕົວຈິງຂອງປະເທດຕົນ. ບໍ່ວ່າສະຖານະການພາຍໃນປະເທດມຽນມາມີການປ່ຽນແປງແນວໃດກໍຕາມ, ຈີນຈະດຳເນີນການຮ່ວມມືແບບຕ່າງຝ່າຍຕ່າງມີຜົນປະໂຫຍດກັບມຽນມາຢ່າງສະໝີຕົ້ນສະເໝີປາຍ, ພ້ອມກັນຊຸກຍູ້ການພົວພັນລະຫວ່າງສອງປະເທດໃຫ້ຂະຫຍາຍຕົວຢ່າງປອດໃສແລະຕໍ່ເນື່ອງ.
ທ່ານ ໄຊມົກຄຳ ກ່າວວ່າ: ມຽນມາໃຫ້ຄວາມສຳຄັນໃນລະດັບສູງຕໍ່ການພົວພັນກັບຈີນ, ຂອບໃຈທີ່ຈີນໄດ້ໃຫ້ການຊ່ວຍເຫຼືອມຽນມາໃນໄລຍະຜ່ານມານີ້. ເຖິງວ່າມຽນມາຈະດຳເນີນການປ່ຽນໂອນອຳນາດກໍຕາມ, ແຕ່ກໍຈະສືບຕໍ່ຊຸກຍູ້ການພັດທະນາການພົວພັນຄູ່ຮ່ວມທີ່ມີໄມຕີຈິດມິດຕະພາບລະຫວ່າງມຽນມາ-ຈີນ ແລະຫວັງຢາກໃຫ້ເພີ່ມທະວີການຮ່ວມມືໃນໂຄງການທີ່ສຳຄັນຕ່າງໆເຊັ່ນ: ໂຄງການເຂດນິຄົມອຸດສາຫະກຳແບບຂ້າມແດນ, ທາງຫຼວງແລະຊົນລະປະທານເປັນຕົ້ນ.
 |
