ສຳເລັດການລາດຕະເວນຮ່ວມຢູ່ຕາມແມ່ນ້ຳຂອງຄັ້ງທີ 44 ລະຫວ່າງຈີນ ລາວ ມຽນມາ ແລະໄທ
2016-03-26 12:54:08 cri
ຕອນບ່າຍວັນທີ 25 ມີນານີ້ ກຳປັ່ນປະຕິບັດກົດໝາຍ 3 ລຳ ແລະພະນັກງານປະຕິບັດກົດໝາຍ 103 ຄົນຂອງຈີນໄດ້ເດີນທາງກັບເມືອຮອດທ່າກຳປັ່ນ ກວນໄຫຼ ຂອງແຂວງຢຸນນານຢ່າງສະດວກ ອັນເປັນການສະແດງໃຫ້ເຫັນວ່າ ການເຄື່ອນໄຫວລາດຕະເວນປະຕິບັດກົດໝາຍຢູ່ລຽບຕາມແມ່ນ້ຳຂອງຄັ້ງທີ 44 ລະຫວ່າງຈີນ ລາວ ມຽນມາແລະໄທ ທີ່ດຳເນີນມາເປັນເວລາ 4 ວັນ 3 ຄືນນັ້ນໄດ້ສຳເລັດລົງຢ່າງຈົບງາມ.
ໃນການລາດຕະເວນປະຕິບັດກົດໝາຍຄັ້ງນີ້ ກອງກຳປັ່ນລາດຕະເວນຮ່ວມຂອງ 4 ປະເທດດັ່ງກ່າວລວມໄດ້ເດີນເຮືອເປັນເວລາ 38 ຊົ່ວໂມງ ໄລຍະທາງນ້ຳ 542 ກິໂລແມັດ, ໄດ້ກວດກາກຳປັ່ນ 28 ລຳ, ສິນຄ້າ 2,410 ກວ່າໂຕນ, ຈຸດໜັກແມ່ນໄດ້ກວດກາຕໍ່ການກະທຳຜິດກົດໝາຍຕ່າງໆເຊັ່ນ: ຄວາມຮຸນແຮງ, ຂາຍປືນເຖື່ອນ, ຄ້າຂາຍຢາເສບຕິດ, ຂາຍສິນຄ້າເຖື່ອນແລະລັກຂ້າມຊາຍແດນເປັນຕົ້ນ.
ນອກນັ້ນ ຍັງໄດ້ດຳເນີນການແລກປ່ຽນດ້ານຂໍ້ມູນຂ່າວສານ, ແລະແລກປ່ຽນດ້ານວັດທະນະທຳແລະກິລາ, ຢ້ຽມຢາມເຊິ່ງກັນແລະກັນ, ອັນໄດ້ເສີມນະຫຍາຍບົດບາດຂອງກົນໄກທີ່ 4 ປະເທດຮ່ວມກັນປະຕິບັດກົດໝາຍເພື່ອຮ່ວມມືກັນປ້ອງກັນຄວາມໝັ້ນຄົງ ໃນການໂຈມຕີການກະທຳຜິດຢູ່ຕາມລ້ອງແມ່ນ້ຳລ້ານຊ້າງ-ແມ່ນ້ຳຂອງ, ປົກປັກຮັກສາຄວາມໝັ້ນຄົງຢູ່ພາກພື້ນ ແລະບໍລິການດ້ານຊີວິດການເປັນຢູ່ແກ່ປະຊາຊົນຢູ່ລຽບຕາມຝັ່ງນ້ຳ, ແລ້ວເພີ່ມທະວີສະຕິກ່ຽວກັບພາກສ່ວນປະຕິບັດກົດໝາຍຂອງ 4 ປະເທດດ່ັງກ່າວຮ່ວມກັນສ້າງປະຊາຄົມຮ່ວມຊາຕາກຳລະຫວ່າງປະເທດຢູ່ລຽງຕາມແມ່ນ້ຳລ້ານຊ້າງ-ແມ່ນ້ຳຂອງ.
