ວັນທີ 22 ເມສານີ້, ທ່ານວັງອີ້ ລັດຖະມົນຕີວ່າການກະຊວງການຕ່າງປະເທດຈີນແລະທ່ານປຼັກ ໂຊຄຸນ, ລັດຖະມົນຕີວ່າການກະຊວງການຕ່າງປະເທດແລະການຮ່ວມມືສາກົນຂອງກຳປູເຈຍ ໄດ້ຮ່ວມກັນພົບປະນັກຂ່າວໂດຍກ່າວວ່າ, ໃນໄລຍະຢ້ຽມຢາມກຳປູເຈຍ, ຈີນແລະກຳປູເຈຍຈະແລກປ່ຽນຄວາມເຫັນຢ່າງເລິກເຊິ່ງກ່ຽວກັບສະຖານະການຂອງທະເລຈີນໃຕ້ໃນປັດຈຸບັນ. ກຳປູເຈຍສະໜັບສະໜູນຫຼັກໝັ້ນແລະຈຸດຢືນຂອງຈີນໃນບັນຫາທະເລຈີນໃຕ້, ຈີນກໍສະໜັບສະໜູນຫຼັກໝັ້ນຂອງກຳປູເຈຍເຊັ່ນກັນ.
ສອງຝ່າຍໄດ້ກ້າວເຖິງຂັ້ນມີຄວາມຮັບຮູ້ຄືກັນທີ່ສຳຄັນວ່າ: ເຄົາລົບສິດທິຂອງປະເທດອະທິປະໄຕແລະປະເທດທີ່ໄດ້ເຊັນ "ສົນທິສັນຍາວ່າດ້ວຍກົດໝາຍມະຫາສະໝຸດຂອງອົງການສະຫະປະຊາຊາດ" ສາມາດເປັນເຈົ້າການຄັດເລືອກວິທີການແກ້ໄຂຄວາມຂັດແຍ້ງກັນ; ອົງການຕຸລາການຫຼືອົງການຕັດສິນສາກົນຄວນເຄົາລົບຢ່າງເຕັມທີ່ຕໍ່ຖະແຫຼງການກ່ຽວກັບການປັດເຂ່ຍຂອງບັນດາປະເທດໂດຍຕາມມາດຕາທີ 298 ຂອງ "ສົນທິສັນຍາວ່າດ້ວຍກົດໝາຍມະຫາສະໝຸດຂອງອົງການສະຫະປະຊາຊາດ", ປະຕິບັດຕາມຂໍ້ກຳນົດ "ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້", ຜ່ານການປຶກສາຫາລືແລະການເຈລະຈາກັນຢ່າງໄມຕີຈິດມິຕະພາບ, ແກ້ໄຂຄວາມຂັດແຍ້ງກັນກ່ຽວກັບຜືນແຜ່ນດິນແລະທະເລໂດຍສັນຕິ; ເພີ່ມທະວີຄວາມໄວ້ເນື້ອເຊື່ອໃຈກັນ, ເພີ່ມການຮ່ວມມືກັນ, ປົກປັກຮັກສາສັນຕິພາບແລະສະຖຽນລະພາບຂອງທະເລຈີນໃຕ້.
 |
