ຕາມຂ່າວCRI: ຫວ່າງມໍ່ໆມານີ້, ໃນໂອກາດທ່ານ ວາງຢີ້ ລັດຖະມົນຕີວ່າການກະຊວງການຕ່າງປະເທດຈີນໄດ້ເດີນທາງຢ້ຽມຢາມບຣູູໄນ, ກຳປູເຈຍ ແລະ ລາວນັ້ນ ທັງ 4 ປະເທດໄດ້ເປັນເອກະພາບຮ່ວມກັນກ່ຽວກັບບັນຫາທະເລຈີນໃຕ້.
ຄວາມເປັນເອກະພາບດັ່ງກ່າວໄດ້ສະແດງອອກຄື ໜຶ່ງ ຈີນແລະ 3 ປະເທດດັ່ງກ່າວລ້ວນແຕ່ເຫັນວ່າ: ບັນຫາຄວາມຂັດແຍ່ງກັນຢູ່ບາງເກາະດອນຂອງໝູ່ເກາະນານຊ່າບໍ່ແມ່ນບັນຫາລະຫວ່າງຈີນ-ອາຊຽນ,ບໍ່ຄວນກໍ່ໃຫ້ເກີດຜົນກະທົບຕໍ່ການພົວພັນລະຫວ່າງຈີນ-ອາຊຽນ; ສອງ ຄວນເຄົາລົບສິດທິຂອງບັນດາປະເທດໃນການເລືອກວິທີແກ້ໄຂຄວາມຂັດແຍ້ງກັນຢ່າງເປັນເຈົ້າການຕາມກົດໝາຍສາກົນ, ບໍ່ເຫັນດີຕໍ່ການກະທຳທີ່ບັງຄັບໃຫ້ຜູ້ອື່ນຍອມຮັບນຳແຕ່ຝ່າຍດຽວ; ສາມ ຄວນອີງຕາມຂໍ້ກຳນົດຂໍ້ທີ 4 ຂອງ "ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້", ຍຶດໝັ້ນການແກ້ໄຂຄວາມຂັດແຍ້ງກັນເໜືອດິນແດນແລະສິດຜົນປະໂຫຍດທາງທະເລໂດຍຜ່ານການຫາລືກັນລະຫວ່າງປະເທດທີ່ກ່ຽວຂ້ອງ; ສີ່ ຈີນແລະບັນດາປະເທດອາຊຽນມີຄວາມສາມາດຮ່ວມກັນປົກປັກຮັກສາສັນຕິພາບແລະສະຖຽນລະພາບຂອງທະເລຈີນໃຕ້ໂດຍຜ່ານການຮ່ວມມືກັນ, ປະເທດຢູ່ນອກພາກພື້ນຄວນເສີມຂະຫຍາຍບົດບາດຢ່າງສ້າງສັນ,ບໍ່ກ້າວກ່າຍການແກ້ໄຂບັນຫາທະເລຈີນໃຕ້.
ຂະນະທີ່ວັນທີ 25 ເມສານີ້, ທ່ານນາງ ຮວ້າຊຸ່ນຢີງ ໂຄສົກກະຊວງການຕ່າງປະເທດຈີນກ່າວວ່າ: ຄວາມເປັນເອກະພາບຮ່ວມກັນດັ່ງກ່າວຢູ່ບົນພື້ນຖານກົດໝາຍສາກົນຕ່າງໆລວມທັງ "ສົນທິສັນຍາກົດໝາຍທາງທະເລຂອງສະຫະປະຊາຊາດ" ທັງຖືກຕ້ອງຕາມຂໍ້ກຳນົດແລະເນື້ອໃນຈິດໃຈຂອງ "ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້" ຢ່າງຮອບດ້ານ. ທັງໝົດນີ້ແມ່ນຊ່ອງທາງອັນແທ້ຈິງທີ່ມີຄວາມເປັນໄປໄດ້ໃນການແກ້ໄຂຄວາມຂັດແຍ້ງກັນຂອງທະເລຈີນໃຕ້ແລະປົກປັກຮັກສາສັນຕິພາບກໍຄືສະຖຽນລະພາບພາກພື້ນ.
 |
