ວັນທີ 14 ພຶດສະພານີ້, ທ່ານທອງລຸນ ສີສຸລິດ, ນາຍົກລັດຖະມົນຕີລາວໄດ້ລົງໄປກວດກາເຂດພັດທະນາກວມລວມໄຊເສດຖານະຄອນຫຼວງວຽງຈັນໂດຍກ່າວຄວາມຫວັງວ່າ, ໂຄງການທີ່ລາວກັບຈີນຮ່ວມກັນພັດທະນາໂຄງການນີ້ ສາມາດກາຍເປັນສາທິດຂອງເຂດພັດທະນາຂອງລາວ, ແລະປະກອບສ່ວນໃໝ່ເຂົ້າໃນການພັດທະນາເສດຖະກິດສັງຄົມລາວ.
ເຂດພັດທະນາດັ່ງກ່າວແມ່ນໂຄງການຮ່ວມມືລະດັບຊາດທີ່ລັດຖະບານຈີນກັບລາວຮ່ວມກັນກຳນົດໄວ້, ກໍແມ່ນເຂດຮ່ວມມືເສດຖະກິດການຄ້າລະດັບຊາດຢູ່ຕ່າງປະເທດພຽງແຫ່ງດຽວຂອງຈີນຢູ່ລາວ, ເຊິ່ງຖືກຈັດເຂົ້າໂຄງການເກັບກ່ຽວໄລຍະຕົ້ນໃນແຜນການຍຸດທະສາດ "ໜຶ່ງແລວທາງໜຶ່ງເສັ້ນທາງ".
ທ່ານທອງລຸນກ່າວວ່າ, ເຂດພັດທະນາດັ່ງກ່າວເນັ້ນການພັດທະນາແບບຍືນຍົງ,ມີ ແຜນການຢ່າງເປັນລະບຽບຮຽບຮ້ອຍ, ຫວັງວ່າການສ້າງສາໂຄງການນີ້ ສາມາດສ້າງຜົນປະໂຫຍດຮ່ວມໃຫ້ແກ່ປະຊາຊົນທ້ອງຖິ່ນ, ຊຸກຍູ້ການຂະຫຍາຍຕົວຂອງເສດຖະກິດສັງຄົມຂອງນະຄອນຫຼວງວຽງຈັນ, ສ້າງລາຍຮັບໃໝ່ແກ່ນະຄອນຫຼວງ, ຍົກລະດັບຊີວິດການເປັນຢູ່ຂອງປະຊາຊົນໃຫ້ສູງຂຶ້ນຕື່ມອີກ, ແລະຊຸກຍູ້ລາວໃຫ້ບັນລຸເປົ້າໝາຍທີ່ພົ້ນອອກຈາກປະເທດດ້ອຍພັດທະນາໃນປີ 2020.
ເຂດພັດທະນານີ້ກວມເນື້ອທີ່ 1149 ເຮັກຕາ, ຕັ້ງຢູ່ທິດຕາເວັນອອກສຽງເໜືອຂອງນະຄອນວຽງຈັນ, ແມ່ນເຂດໃຈກາງຂອງເຂດຕົວເມືອງໃໝ່ໃນວຽງຈັນ. ປັດຈຸບັນ, ໄດ້ສຳເລັດການລົງທຶນໃສ່ພື້ນຖານໂຄງລ່າງຂອງເຂດພັດທະນາ ນັບລວມເຂົ້າ ຫຼາຍກວ່າ 200 ລ້ານໂດລາສະຫະລັດ.