ທູດຈີນປະຈຳອາເມລິກາຊີ້ອາເມລິກາສືບຕໍ່ສົ່ງກຳປັ່ນແລະຍົນທະຫານໄປທະເລຈີນໃຕ້ຈະເຮັດໃຫ້ບັນຫານີ້ກາຍເປັນບັນຫາການທະຫານທີ່ແທ້ຈິງ
2016-05-20 11:48:22 cri
ຫວ່າງມໍ່ໆມານີ້, ທ່ານສຸ່ຍຖ່ຽນຄາຍ ເອກອັກຄະລັດຖະທູດຈີນປະຈຳອາເມລິກາໄດ້ກ່າວປາຖະກະຖາຢູ່ສູນແຫ່ງປັນຍາແຫ່ງໜຶ່ງທີ່ອາເມລິກາ ໂດຍເຕືອນວ່າ, ຖ້າວ່າລັດຖະບານອາເມລິກາຍັງບໍ່ປ່ຽນແປງພຶດຕິກຳຂອງຕົນທີ່ສົ່ງກຳປັ່ນແລະຍົນທະຫານໄປສູ່ທະເລຈີນໃຕ້ແລ້ວ ກໍຈະເຮັດໃຫ້ບັນຫາທະເລຈີນໃຕ້ກາຍເປັນບັນຫາການທະຫານ. ແນວໃດກໍດີຂໍຮຽກຮ້ອງໃຫ້ສອງປະເທດຈີນ-ອາເມລິກາຄວບຄຸມຄວາມຂັດແຍ້ງກັນຢ່າງແທ້ຈິງ ແລະມີລັກສະນະສ້າງສັນ, ເພື່ອບໍ່ໃຫ້ຄວາມຂັດແຍ້ງເຫຼົ່ານີ້ກາຍເປັນບັນຫາທີ່ບໍ່ສົ່ງຜົນດີຕໍ່ການພົວພັນລະຫວ່າງສອງປະເທດ.
ທ່ານສຸ່ຍຖ່ຽນຄາຍກ່າວເນັ້ນວ່າ, ໜ້າທີ່ບູລິມະສິດອັນດັບໜຶ່ງຂອງຈີນແມ່ນລົງເລິກການປະຕິຮູບຢ່າງຮອບດ້ານ ແລະຫັນເປັນທັນສະໄໝຢ່າງແທ້ຈິງ, ຂະນະທີ່ເປົ້າໝາຍອັນດັບໜຶ່ງຂອງການຕ່າງປະເທດຈີນຄືຍາດແຍ່ງສ້າງໃຫ້ສະພາບແວດລ້ອມພາຍນອກທີ່ມີສັນຕິພາບ ແລະມີຜົນດີ. ຈາກນີ້ ຈີນຈິ່ງຕ້ອງການສ້າງການພົວພັນທີ່ຕັ້ງໜ້າແລະໝັ້ນຄົງກັບອາເມລິກາ, ແຕ່ໃນຂະນະອາເມລິກາທຳລາຍຜົນປະໂຫຍດຂອງຈີນນັ້ນ, ແນ່ນອນວ່າຈີນຕ້ອງເດັດດ່ຽວປົກປັກຮັກສາ ຜົນປະໂຫຍດຂອງຕົນເອງຢ່າງແຂງແຮງ, ແລະຮຽກຮ້ອງໃຫ້ອາເມລິກາຈົ່ງປ່ຽນແປງການປະພຶດຂອງຕົນ, "ແຕ່ການເຮັດແນວນີ້ບໍ່ແມ່ນເພື່ອທ້າທາຍຕໍ່ຖານະອາເມລິກາ ແລະກໍບໍ່ແມ່ນການຢາກຈະເຂົ້າແທນທີ່ອາເມລິກາແຕ່ປະການໃດ".
ທ່ານສຸ່ຍຖ່ຽນຄາຍກ່າວວ່າ, ການທີ່ອາເມລິກາກ່າວຢ້ຳຄັດຄ້ານບໍ່ໃຫ້ບັນຫາທະເລຈີນໃຕ້ກາຍເປັນບັນຫາການທະຫານ ແຕ່ຄວາມຈິງແລ້ວ: ອາເມລິກາພັດສົ່ງກຳປັ່ນ ແລະຍົນທະຫານໄປທະເລຈີນໃຕ້ຢ່າງຕໍ່ເນື່ອງ, ການກະທຳຄືລັກສະນະນີ້ຖ້າວ່າບໍ່ຖືກຈຳກັດ ກໍຈະເຮັດໃຫ້ບັນຫາທະເລຈີນໃຕ້ກາຍເປັນບັນຫາການທະຫານທີ່ແທ້ຈິງ.