ຂ່າວສານຊິນຮວາລາຍງານວ່າ: ພາຍຫຼັງພັກປະຊາທິປະໄຕກ້າວໜ້າຂອງໄຕ້ຫວັນຂຶ້ນກຳອຳນາດແລ້ວໃນວັນທີ 21 ພຶດສະພານີ້, ຕໍ່ກັບບັນຫາທີ່ກົນໄກພົວພັນແລກປ່ຽນລະຫວ່າງຫ້ອງການວຽກງານໄຕ້ຫວັນຂອງລັດຖະບານຈີນແລະຄະນະກຳມະການຈີນແຜ່ນດິນໃຫຍ່ຂອງໄຕ້ຫວັນຈະສາມາດສືບຕໍ່ດຳເນີນໄປໄດ້ຫຼືບໍ່, ທ່ານ ມາສ້ຽວກວ່າງ ໂຄສົກຫ້ອງການວຽກງານໄຕ້ຫວັນຂອງລັດຖະບານຈີນໄດ້ກ່າວວ່າ, ພຽງແຕ່ຍຶດໝັ້ນ "ຂໍ້ຕົກລົງປີ 1992" ເຊິ່ງເປັນພື້ນຖານທາງການເມືອງຮ່ວມທີ່ສ່ອງແສງໃຫ້ເຫັນຫຼັກໝັ້ນປະເທດຈີນດຽວເທົ່ານັ້ນແລ້ວ, ກົນໄກດັ່ງກ່າວຈຶ່ງສາມາດສືບຕໍ່ດຳເນີນໄປໄດ້. ທ່ານ ມາສ້ຽວກວ່າງ ກ່າວຕື່ມວ່າ, ນັບແຕ່ເດືອນກຸມພາປີ 2014 ເປັນຕົ້ນມາ, ສອງອົງການດັ່ງກ່າວໄດ້ຕັ້ງສາຍດ່ວນລະຫວ່ງສອງຝັ່ງຊ່ອງແຄບໄຕ້ຫວັນແລະໄດ້ຮັກສາການພົວພັນກັນຢ່າງໃກ້ຊິດທັງໄດ້ຮ່ວມມືແກ້ໄຂບັນຫາອ່ອນໄຫວແລະສັບສົນເປັນຈຳນວນຫຼາຍ ເຊິ່ງໄດ້ຮັບການຍ້ອງຍໍໂດຍທົ່ວໄປຈາກວົງການຕ່າງໆຂອງສອງຝັ່ງ.
ມື້ດຽວກັນ, ຜູ້ຮັບຜິດຊອບຂອງສະມາຄົມສາຍພົວພັນລະຫວ່າງສອງຝັ່ງຊ່ອງແຄບໄຕ້ຫວັນ ຫຼື ARATS ກໍໄດ້ແຈ້ງທ່າທີຕໍ່ກົນໄກພົວພັນ-ແລກປ່ຽນພາຍໃຕ້ການມອບສິດລະຫວ່າງ ARATS ແລະກອງທຶນການແລກປ່ຽນລະຫວ່າງສອງຝັ່ງຊ່ອງແຄບ ໄຕ້ຫວັນຫຼື SEF ໃນອະນາຄົດໂດຍກ່າວວ່າ, ຈຸດປະສົງແລະຄວາມຈິງໃຈຂອງພວກເຮົາໃນການຊຸກຍູ້ການປຶກສາຫາລືແລະເຈລະຈາກັນລະຫວ່າງສອງຝັ່ງບົນພື້ນຖານ "ຂໍ້ຕົກລົງປີ 1992" ນັ້ນຈະບໍ່ປ່ຽນແປງ. ແນວໃດກໍດີ, ຂໍພຽງແຕ່ SEF ໄດ້ຮັບການມອບສິດແລະຍຶດໝັ້ນຂໍ້ຕົກລົງດັ່ງກ່າວ, ກົນໄກພົວພັນ-ແລກປ່ຽນພາຍໃຕ້ການມອບສິດລະຫວ່າງ ARATS ແລະ SEF ກໍຈະສາມາດສືບຕໍ່ດຳເນີນໄປໄດ້.