ທ່ານສາງວ້ານສວນ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງປ້ອງກັນປະເທດຈີນ ໄດ້ເຂົ້າຮ່ວມກອງປະຊຸມວົງແຄບລັດຖະມົນຕີກະຊວງປ້ອງກັນປະເທດຈີນ-ອາຊຽນຄັ້ງທີ 6 ຢູ່ນະຄອນຫຼວງວຽງຈັນ ສປປ ລາວໃນຕອນບ່າຍວັນທີ 25 ພຶດສະພານີ້.
ໂອກາດດັ່ງກ່າວ, ທ່ານສາງວ້ານສວນ ໄດ້ກ່າວວ່າ: ປັດຈຸບັນ, ເຖິງວ່າໄພຄຸກຄາມຄວາມໝັ້ນຄົງທັງແບບເກົ່າແລະແບບໃໝ່ຍັງພົ້ນເດັ່ນຄືເກົ່າກໍຕາມ, ແຕ່ສະຕິຕໍ່ຜົນປະໂຫຍດແຫ່ງຊາດແລະສະຕິຕໍ່ປະຊາຄົມຮ່ວມຊາຕາກຳໃນພາກພື້ນໄດ້ເພີ່ມທະວີຂຶ້ນຊັກໄຊ້. ແນວໃດກໍດີ, ທາງເລືອກຂອງຈີນທີ່ຍຶດໝັ້ນເດີນຕາມເສັ້ນທາງພັດທະນາໂດຍສັນຕິນັ້ນຈະບໍ່ປ່ຽນແປງ, ຈະພະຍາຍາມຕັ້ງໜ້າຊຸກຍູ້ການຮ່ວມມືໃນພາກພື້ນຢ່າງບໍ່ລົດລະ, ຄວາມຈິງໃຈທີ່ຍຶດໝັ້ນການແກ້ໄຂຄວາມຂັດແຍ້ງກັນໂດຍຜ່ານການປຶກສາຫາລືກັນດ້ວຍສັນຕິວິທີຈະບໍ່ມີວັນຄອນແຄນ ແລະຈະບໍ່ຫຼີກເວັ້ນຄວາມຮັບຜິດຊອບໃນການປົກປັກຮັກສາສັນຕິພາບແລະສະຖຽນລະພາບຂອງພາກພື້ນຢ່າງເດັດຂາດ. ເພື່ອຊຸກຍູ້ການຮ່ວມມືດ້ານການປ້ອງກັນປະເທດແລະຄວາມໝັ້ນຄົງລະຫວ່າງຈີນ-ອາຊຽນຕື່ມນັ້ນ, ກອງທັບຈີນຫວັງວ່າຈະດຳເນີນການຝຶກຊ້ອມຮ່ວມກັບກອງທັບປະເທດອາຊຽນກ່ຽວກັບກົດແຫ່ງການປະສົບຢ່າງບັງເອີນຢູ່ເທິງທະເລ ຢູ່ທະເລຈີນໃຕ້ໂດຍໄວ, ຍິນດີເພີ່ມທະວີການຮ່ວມມືຕ້ານລັດທິກໍ່ການຮ້າຍລະຫວ່າງພາກສ່ວນປ້ອງກັນປະເທດຈີນແລະອາຊຽນ ແລະຊຸກຍູ້ການຮ່ວມມືແລກປ່ຽນລະຫວ່າງເຂດສະໜາມຮົບພາກໃຕ້ຈີນແລະກອງທັບປະເທດອາຊີຕາເວັນອອກສຽງໃຕ້.
ຜູ້ນຳກິດຈະການປ້ອງກັນປະເທດຂອງປະເທດອາຊຽນໂດຍທົ່ວໄປສະແດງຄວາມຊົມເຊີຍທີ່ຈີນໄດ້ປະກອບສ່ວນຢ່າງຕັ້ງໜ້າເຂົ້າໃນສັນຕິພາບ ແລະ ສະຖຽນລະພາບຂອງພາກພື້ນ ແລະຂໍ້ສະເໜີທີ່ກ່ຽວຂ້ອງ ແລະກ່າວຍິນດີສືບຕໍ່ລົງເລິກການຮ່ວມມືທີ່ແທ້ຈິງກັບຈີນ; ດຳເນີນການແກ້ໄຂຄວາມຂັດແຍ້ງທີ່ກ່ຽວຂ້ອງໂດຍຜ່ານການປຶກສາຫາລືດ້ວຍສັນຕິວິທີ ແລະຮ່ວມກັນປົກປັກຮັກສາສັນຕິພາບແລະຄວາມໝັ້ນຄົງຂອງພາກພື້ນ.