ຕາມຂ່າວສານຈີນ: ວັນທີ 22 ມິຖຸນານີ້, ເວທີປຶກສາຫາລືການພັດທະນາເສດຖະກິດ-ສັງຄົມແລະຫຼຸດຜ່ອນຄວາມທຸກຍາກຈີນ-ອາຊຽນຄັ້ງທີ 10 ທີ່ຈັດຂຶ້ນຢູ່ເມືອງກຸ້ຍຫຼິນເຂດປົກຄອງຕົນເອງເຜົ່າຈວ້າງກວາງຊີຈີນໄດ້ເປີດເຜີຍວ່າ, ການຮ່ວມມືຫຼຸດຜ່ອນຄວາມທຸກຍາກລະຫວ່າງຈີນແລະຫຼາຍປະເທດຢູ່ອາຊຽນໄດ້ຮັບໝາກຜົນດີ.
ທ່ານ ດຣ ໂມສຕານ ຮອງເລຂາທິການກອງເລຂາອາຊຽນຊີ້ໃຫ້ເຫັນວ່າ, ນັບແຕ່ໄດ້ຮ່ວມມືຫຼຸດຜ່ອນຄວາມທຸກຍາກເປັນຕົ້ນມາ, ປະຊາຊົນທີ່ທຸກຍາກທີ່ສຸດໃນອາຊຽນໄດ້ຫຼຸດລົງໃນລະດັບຕ່ຳກວ່າ 1%, ຂະນະທີ່ຜູ້ໄດ້ຮັບການສຶກສາກໍເພີ່ມຫຼາຍຂຶ້ນແລະທຸກໆປະເທດໃນອາຊຽນລ້ວນແຕ່ໄດ້ຮັບໂອກາດການ ສຶກສາພາກບັງຄັບ. ແນວໃດກໍດີ, ຫວັງວ່າອາຊຽນແລະຈີນຈະສາມາດສ້າງ ສາຍພົວພັນຄູ່ຮ່ວມມືໃຫ້ແໜ້ນແຟ້ນກວ່າເກົ່າໃນຂອບ "ໜຶ່ງແລວທາງໜຶ່ງເສັ້ນທາງ" ເພື່ອຮ່ວມກັນຮັບມືກັບສິ່ງທ້າທາຍໃນການຫຼຸດຜ່ອນຄວາມທຸກຍາກ.
ທ່ານ ສົມສະໜິດ ສຸວັນນະລາດ ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ ທັງເປັນຮອງປະທານຄະນະກຳມະການພັດທະນາຊົນນະບົດແລະຫຼຸດຜ່ອນຄວາມທຸກຍາກແຫ່ງຊາດລາວເຫັນວ່າ, ການຮ່ວມກັນສ້າງ "ໜຶ່ງແລວທາງໜຶ່ງເສັ້ນທາງ" ເປັນໂອກາດດີສຳລັບການຫຼຸດຜ່ອນຄວາມທຸກຍາກຢູ່ຊົນນະບົດຂອງຈີນ-ອາຊຽນ. ຂະນະທີ່ໂຄງການທາງລົດໄຟລາວ-ຈີນທີ່ພວມກໍ່ສ້າງໄດ້ຊຸກຍູ້ການພັດທະນາເສດຖະກິດ-ສັງຄົມປະເທດຕົນເປັນຢ່າງດີໂດຍສະເພາະໄດ້ເລັ່ງລັດການພັດທະນາຢູ່ຊົນນະບົດກໍຄືການຫຼຸດຜ່ອນຄວາມທຸກຍາກໃຫ້ໄວກວ່າເກົ່າ.