ຂ່າວສານຊິນຮວາລາຍງານວ່າ: ຄະນະເລຂາທິການສານອະນຸຍາໂຕຕຸລາການກ່ຽວກັບຄະດີຕັດສິນບັນຫາທະເລຈີນໃຕ້ທີ່ສະເໜີໂດຍຟີລິບປິນນັ້ນໄດ້ຖະແຫຼງໃນວັນທີ 29 ມິຖຸນານີ້ວ່າ: ສານດັ່ງກ່າວຈະປະກາດຄຳຕັດສິນທີ່ເປັນຮູບປະທຳກ່ຽວກັບຄະດີບັນຫາທະເລຈີນໃຕ້ທີ່ສະເໜີໂດຍຟີລິບປິນໃນວັນທີ 12 ກໍລະກົດ 2016 ນີ້. ຂະນະທີ່ຊ່ຽວຊານແລະນັກວິຊາການຕ່າງປະເທດເກີດຄວາມລະແວງສົງໄສຟີລິບປິນທີ່ສະເໜີໃຫ້ສານອະນຸຍາໂຕຕຸລາການຕັດສິນບັນຫາທະເລຈີນໃຕ້ພຽງແຕ່ຝ່າຍດຽວໂດຍເຫັນວ່າ: ຫຼັກໝັ້ນຂອງລັດຖະບານຈີນກ່ຽວກັບການບໍ່ເຂົ້າຮ່ວມແລະບໍ່ຮັບເອົາຄະດີຕັດສິນໂດຍສານອະນຸຍາໂຕຕຸລາການພ້ອມທັງບໍ່ຮັບຮອງແລະບໍ່ປະຕິບັດຄຳຕັດສິນຂອງສານດັ່ງກ່າວນັ້ນແມ່ນສົມເຫດສົມຜົນແລະຖືກຕ້ອງຕາມກົດໝາຍ.ບັນດາຊ່ຽວຊານຍັງຊີ້ໃຫ້ເຫັນວ່າ: ຈີນກັບປະເທດທີ່ກ່ຽວຂ້ອງໃນພາກພື້ນເຊິ່ງລວມທັງຟີລິບປິນໄດ້ມີເອກະສານທີ່ຖືກຕ້ອງຕາມກົດໝາຍແລະວິຖີທາງທີ່ບັງເກີດຜົນໃນການປຶກສາຫາລືແກ້ໄຂບັນຫາທະເລຈີນໃຕ້ມາແລ້ວ, ການທີ່ຟີລິບປິນສະເໜີໃຫ້ສານອະນຸຍາໂຕຕຸລາການຕັດສິນບັນຫາດັ່ງກ່າວພຽງຝ່າຍດຽວນັ້ນຈະບໍ່ສາມາດນຳເອົາຜົນປະໂຫຍດໄປໃຫ້ຝ່າຍທີ່ກ່ຽວຂ້ອງແຕ່ປະການໃດ,ກົງກັນຂ້າມຈະເຮັດໃຫ້ສະຖານະການສັບສົນຂຶ້ນ.
ທ່ານ ໂຣດ ຄາບລານ ນັກຂຽນຄໍລຳສະເພາະຂອງໜັງສືພິມ "ຄັນທຸງ" ຟິລິບປິນ ໄດ້ລົງພິມບົດຄວາມໂດຍລະບຸວ່າ, ລັດຖະບານອາກີໂນ ຕົກລົງສະເໜີບັນຫາທະເລຈີນໃຕ້ໃຫ້ສານຕັດສິນ ເຊິ່ງບໍ່ສາມາດຮຽກກັບຄືນມາໄດ້ ນັ້ນສົ່ງຜົນເຮັດໃຫ້ຟິລິບປິນບໍ່ມີຊ່ອງທາງແກ້ໄຂຄວາມຂັດແຍ້ງກັນໂດຍຜ່ານການເຈລະຈາກັບໂດຍກົງຈີນ. ລັດຖະບານອາກີໂນບໍ່ໄດ້ສຳນຶກວ່າ, ມີແຕ່ຮັກສາຊ່ອງທາງເຈລະຈາເທົ່ານັ້ນ ຈຶ່ງຈະມີຄວາມເປັນໄປໄດ້ໃນການແກ້ໄຂຄວາມຂັດແຍ້ງກັນ.
ທ່ານ ວິນລຽມ ໂຈນສ໌ ຫົວໜ້າສຳນັກວາລະສານ "ຍຸດໂທບາຍແລະຂໍ້ມູນຂ່າວສານທົ່ວໂລກ" ຂອງອາເມລິກາສາຂາວໍຊິງຕັນ ທັງເປັນຜູ້ຊ່ຽວຊານບັນຫາສາກົນຂອງອາເມລິກາ ໃຫ້ສຳພາດຕໍ່ນັກຂ່າວວ່າ, ຄວາມເຫັນຂອງຈີນທີ່ມີອະທິປະໄຕຕໍ່ດິນແດນທະເລຈີນໃຕ້ນັ້ນ "ສົມເຫດສົມຜົນແລະຖືກຕ້ອງຕາມກົດໝາຍ", ຫຼັກອ້າງອີງດ້ານປະຫວັດສາດທີ່ຈີນມີນັ້ນ "ໂຕ້ຖຽງກັນບໍ່ໄດ້". ລັດຖະບານຈີນມີຄວາມເຫັນຕະຫຼອດມາໃຫ້ແກ້ໄຂບັນຫາຄວາມຂັດແຍ້ງກັນໂດຍຜ່ານການເຈລະຈາ, ແຕ່ຟິລິບປິນຊ້ຳພັດ "ແຂງກະດ້າງ" ໂດຍໃຊ້ວິທີການຮ້ອງຂໍຕັດສິນ ເຊິ່ງໄດ້ຮັບການສະໜັບສະໜູນຈາກອາເມລິກາ, ທັງນີ້ບໍ່ພຽງແຕ່ບໍ່ເປັນຜົນດີຕໍ່ການແກ້ໄຂບັນຫາໂດຍສັນຕິເທົ່ານັ້ນ, ຍັງຈະເຮັດໃຫ້ການເຈລະຈາໃນຕໍ່ໜ້າຫຍຸ້ງຍາກກວ່າເກົ່າ. ຈີນມີເຫດຜົນທີ່ຖືກຕ້ອງໃນການປະຕິເສດບໍ່ຮັບເອົາການຕັດສິນແບບບັງຄັບດັ່ງກ່າວ.