ນັກວິຊາການຈີນແລະຫວຽດນາມ 50 ກວ່າທ່ານທີ່ເຂົ້າຮ່ວມການສຳມະນາວິຊາການສາກົນກ່ຽວກັບທິດສະດີແລະການປະຕິບັດຕົວຈິງດ້ານການປົກຄອງປະເທດແລະການຄຸ້ມຄອງລັດຂອງພັກກອມມູນິດຈີນແລະພັກກອມມູນິດຫວຽດນາມ ຢູ່ມະຫາວິທະຍາໄລຢຸນນານຈີນໃນວັນທີ 29 ມິຖຸນານີ້ ໄດ້ຮ່ວມກັນຄົ້ນຄວ້າບັນຫາໂລກຍຸກປັດຈຸບັນກັບສັງຄົມນິຍົມ, ທິດສະດີແລະການປະຕິບັດຕົວຈິງດ້ານການປົກຄອງປະເທດແລະການຄຸ້ມຄອງລັດຂອງພັກກອມມູນິດສອງປະເທດ, ຄວາມເປັນເຈົ້າການເຊື່ອມໂຍງກັບປະຊາຄົມໂລກຢ່າງຕັ້ງໜ້າທັງປັບປຸງໂຄງປະກອບເສດຖະກິດໃຫ້ສົມບູນ, ການປະຕິຮູບລັດວິສາຫະກິດ ແລະຫົວຂໍ້ອື່ນໆ.
ທ່ານໂດຕຽນເຊິມ ອະດີດຫົວໜ້າສະຖາບັນຈີນຂອງສະຖາບັນວິທະຍາສາດສັງຄົມແຫ່ງຊາດຫວຽດນາມ ຊີ້ວ່າ: ຫວຽດນາມແລະຈີນມີເສັ້ນທາງພັດທະນາ ຂະບວນການປະຕິຮູບແລະເປີດປະຕູສູ່ພາຍນອກຄ້າຍຄືກັນ ແລະ ສາມາດຖອດຖອນບົດຮຽນນຳກັນໃນຫຼາຍໆບັນຫາ.
ທ່ານຂົງເກິ່ນຫົງ ທີ່ປຶກສາທູດຫ້ອງການຄົ້ນຄວ້າຂອງຄະນະພົວພັນກັບຕ່າງປະເທດສູນກາງພັກກອມມູນິດຈີນ ເຫັນວ່າ ຈີນຍັງຄົງແມ່ນປະເທດທີ່ພວມພັດທະນາ ຈະຕ້ອງເພີ່ມທະວີການຮ່ວມມືກັບປະເທດທີ່ພວມພັດທະນາ. ຂະນະທີ່ຈີນແລະຫວຽດນາມລ້ວນແຕ່ແມ່ນປະເທດສັງຄົມນິຍົມ ແລະ ເປັນປະເທດທີ່ພວມພັດທະນາເຊັ່ນດຽວກັນ, ສອງປະເທດມີຜົນປະໂຫຍດຮ່ວມໃນຫຼາຍດ້ານ ແລະການທີ່ສອງຝ່າຍເພີ່ມທະວີການແລກປ່ຽນແລະຮ່ວມມືຈຶ່ງແມ່ນເສັ້ນທາງທີ່ຕ່າງຝ່າຍຕ່າງມີຜົນປະໂຫຍດໃນໄລຍະຍາວນານ.