ຂ່າວສານຊິນຮວາອ້າງຕາມຫ້ອງການສຳນັກງານປະທານາທິບໍດີຕວກກີທີ່ໄດ້ລາຍງານໃນວັນທີ 29 ມິຖຸນານີ້ວ່າ: ໃນມື້ດັ່ງກ່າວ, ທ່ານປະທານາທິບໍດີ ແລແຊບ ທາຢິບ ເອໂຕອັນ ໄດ້ຮັບໂທລະສັບຈາກທ່ານ ວຼາດິເມຍ ປູຕິນ ປະທານາທິບໍດີຣັດເຊຍ ໂດຍສອງທ່ານໄດ້ເນັ້ນຄວາມສຳຄັນໃນການໃຊ້ມາດຕະການທີ່ຈຳເປັນເພື່ອຊຸກຍູ້ຟື້ນຟູສາຍພົວພັນສອງຝ່າຍໃຫ້ເຂົ້າສູ່ສະພາບປົກກະຕິແລະເພີ່ມທະວີການຮ່ວມມືເສດຖະກິດ-ການຄ້າ.
ນີ້ເປັນເທື່ອທຳອິດທີ່ປະທານາທິບໍດີສອງປະເທດດັ່ງກ່າວສົນທະນາທາງໂທລະ ສັບໂດຍກົງນັບແຕ່ສາຍພົວພັນສອງປະເທດຊຸດໂຊມລົງເນື່ອງຈາກຕວກກີຍິງຍົນຮົບຣັດເຊຍຕົກເມື່ອທ້າຍເດືອນພະຈິກຜ່ານມາ.
ກົມຖະແຫຼງຂ່າວປະທານາທິບໍດີຣັດເຊຍເປີດເຜີຍໃນວັນທີ 29 ມິຖຸນານີ້ວ່າ, ການສົນທະນາດັ່ງກ່າວມີຄວາມສ້າງສັນໂດຍຈຸດປະສົງເພື່ອຟື້ນຟູສາຍພົວພັນຮ່ວມມືທີ່ເປັນມູນເຊື້ອໃນຂົງເຂດຕ່າງໆຂອງສອງປະເທດໃຫ້ດີຂຶ້ນ. ທ່ານ ປູຕິນ ຊີ້ໃຫ້ເຫັນວ່າ, ການທີ່ທ່ານ ເອໂຕອັນ ສົ່ງຈົດໝາຍຂໍອະໄພກ່ອນໜ້ານີ້ນັ້ນໄດ້ສ້າງເງື່ອນໄຂໃຫ້ແກ່ການຫຼີກເວັ້ນຄວາມອັນຕະລາຍຕໍ່ສາຍພົວພັນສອງປະເທດແລະເຮັດໃຫ້ສອງປະເທດສາມາດປະສານງານເພື່ອຮັບມືກັບບັນຫາພາກພື້ນແລະສາກົນຄືນໃໝ່ແລະດຳເນີນການຮ່ວມມືກັນຢ່າງຮອບດ້ານ.