ວັນທີ 2 ກໍລະກົດນີ້, ທ່ານເຊີແກ ລັຟລົຟ ລັດຖະມົນຕີການຕ່າງປະເທດຣັດເຊຍໄດ້ສົນທະນາຜ່ານທາງໂທລະສັບກັບທ່ານຈອນເຄຣີ ລັດຖະມົນຕີການຕ່າງປະເທດອາເມລິກາ,ສອງຝ່າຍໄດ້ປຶກສາຫາລືຄວາມເປັນໄປໄດ້ໃນການປະສານງານໂຈມຕີກຸ່ມກໍ່ການຮ້າຍຢູ່ດິນແດນຊີຣີ.
ຕາມກະຊວງການຕ່າງປະເທດຣັດເຊຍແຈ້ງໃຫ້ຊາບວ່າ:ທ່ານລັຟລົຟແລະທ່ານເຄຣີໄດ້ຫາລືວິຖີທາງໃນການແກ້ໄຂການປະທະກັນຢູ່ຊີຣີເຊິ່ງລວມທັງຄວາມເປັນໄປໄດ້ທີ່ສອງປະເທດປະສານງານກັນໃນການໂຈມຕີກຸ່ມກໍ່ການຮ້າຍຢູ່ດິນແດນຊີຣີ.
ໜັງສືພິມວໍຊິງຕັນໂພສສະບັບວັນທີ 30 ມິຖຸນາຜ່ານມາລາຍງານວ່າ: ລັດຖະບານໂອບາມາໄດ້ມີຂໍ້ສະເໜີຕໍ່ລັດຖະບານຣັດເຊຍເພື່ອລົງເລິກການຮ່ວມມືທາງການທະຫານກ່ຽວກັບບັນຫາຊີຣີ.
ວັນທີ 22 ກຸມພາຜ່ານມາ, ຣັດເຊຍແລະອາເມລິກາໄດ້ບັນລຸສັນຍາກ່ຽວກັບການຢຸດຍິງຂອງບັນດາຝ່າຍທີ່ປະທະກັນຢູ່ຊີຣີ ເຊິ່ງສັນຍາດັ່ງກ່າວເກີດມີຜົນສັກສິດມາແຕ່ວັນທີ 27 ກຸມພາ, ແຕ່ການຢຸດຍິງບໍ່ໄດ້ກວມເຖິງການໂຈມຕີກຸ່ມກໍ່ການຮ້າຍທີ່ໄດ້ຮັບການຢືນຢັນຈາກສະພາຄວາມໝັ້ນຄົງອົງການສະຫະປະຊາຊາດເຊັ່ນກຸ່ມ IS ແລະກຸ່ມ "ແນວໂຮມກູ້ຊາດ". ໃນຫຼາຍເດືອນມານີ້, ກຸ່ມ IS ແລະກຸ່ມ "ແນວໂຮມກູ້ຊາດ"ພ້ອມດ້ວຍກຸ່ມຕໍ່ຕ້ານລັດຖະບານອື່ນໆໄດ້ຍິງປະທະກັບກອງທັບລັດຖະບານຊີຣີໃນບາງຄັ້ງຄາວ, ສະຖານະການຄວາມໝັ້ນຄົງຢູ່ຊີຣີບໍ່ສາມາດເຫັນໄປໃນແງ່ດີໄດ້.
 |
