ກອງປະຊຸມລັດຖະມົນຕີການຄ້າກຸ່ມ20ປະເທດຫຼື G20 ໄດ້ອັດລົງແລ້ວໃນວັນທີ 10 ກໍລະກົດນີ້ຢູ່ນະຄອນຊຽງໄຮ ສປ ຈີນແລະໃນໂອກາດດັ່ງກ່າວທ່ານກ່າວຫູເສິງ ປະທານກອງປະຊຸມ, ລັດຖະມົນຕີກະຊວງການຄ້າຈີນຖະແຫຼງວ່າ: ກອງປະຊຸມໄດ້ເປີດເຜີຍຖະແຫຼງການລັດຖະ ມົນຕີການຄ້າສະບັບທຳອິດໃນປະຫວັດສາດຂອງ G20 ແລະໄດ້ອະນຸມັດເອກະສານສາມສະບັບທັງໄດ້ບັນລຸຄວາມເປັນເອກະພາບກັນສອງປະການເຊິ່ງນັບວ່າເປັນຜົນສຳເລັດສຳຄັນຄັ້ງປະຫວັດການ.
ຖະແຫຼງການລະບຸວ່າ: ພວກຂ້າພະເຈົ້າເຫັນດີນຳໃຊ້ການຈັດຕັ້ງປະຕິບັດຫຼາຍກວ່າເກົ່າເພື່ອບັນລຸເປົ້າໝາຍຮ່ວມຄືເຮັດໃຫ້ເສດຖະກິດໂລກເຕີບໂຕ, ໝັ້ນທ່ຽງແລະຈະເລີນຮຸ່ງເຮືອງ. ການຄ້າແລະການລົງທຶນຄວນສືບຕໍ່ເປັນກຳລັງແຮງສຳຄັນໃນການຊຸກຍູ້ໃຫ້ເສດຖະກິດເຕີບໂຕແລະພັດທະນາ,ເປັນຜົນດີຕໍ່ການສ້າງວຽກເຮັດງານທຳ, ສົ່ງເສີມການປະດິດສ້າງ, ເພີ່ມສະຫວັດດີການພ້ອມທັງຊຸກຍູ້ໃຫ້ເສດຖະກິດເຕີບໂຕໃນລັກສະນະເປີດກວ້າງ.
ທ່ານກ່າວຫູເສິງກ່າວໃນພິທີຖະແຫຼງຂ່າວວ່າ: ກອງປະຊຸມໄດ້ກຳນົດພາລະໜ້າທີ່ວຽກງານຂອງໜ່ວຍງານການຄ້າແລະການລົງທຶນ, ຍຸດທະສາດການເຕີບໂຕຂອງການຄ້າທົ່ວໂລກແລະຫຼັກການຊີ້ນຳການລົງທຶນທົ່ວໂລກຂອງ G20.
ທີ່ສຳຄັນ, ກອງປະຂຸມໄດ້ບັນລຸຄວາມເປັນເອກະພາບກັນກ່ຽວກັບການເພີ່ມທະວີລະບົບການຄ້າຫຼາຍຝ່າຍທັງບັນລຸຄວາມເປັນເອກະພາບກັນກ່ຽວກັບການປະຕິບັດນະໂຍບາຍລວມ,ຊ່ວຍປະເທດພວມພັດທະນາແລະວິສາຫະກິດຂະໜາດກາງແລະນ້ອບເຊື່ອມໂຍງເຂົ້າກັບຕ່ອງໂສ້ມູນຄ່າທົ່ວໂລກ.
 |
