ຢູ່ກອງປະຊຸມຖະແຫຼງຂ່າວຂອງກະຊວງການຕ່າງປະເທດຈີນໃນວັນທີ 12 ກໍລະກົດນີ້, ທ່ານລູ້ຄ່າງ ໂຄສົກກະຊວງການຕ່າງປະເທດຈີນຖະແຫຼງວ່າ: ກ່ອນທີ່ອາເມລິກາປະຕິບັດຍຸດທະສາດ "ສ້າງຄວາມກ້ຳເກິ່ງກັນຄືນໃໝ່ຢູ່ອາຊີປາຊີຟິກ"ແລະຖືວ່າຢູ່ເຂດທະເລຈີນໃຕ້ຈະມີຂໍ້ຂັດແຍ້ງ, ລະຫວ່າງປະເທດກ່ຽວຂ້ອງມີຄວາມຂັດແຍ້ງກໍຕາມ,ແຕ່ໂດຍລວມແລ້ວຍັງມີຄວາມສະຫງົບແລະມີສັນຕິພາບທີ່ສຸດ. ແນວໃດກໍດີ, ພາຍຫຼັງອາເມລິກາປະຕິບັດຍຸດທະສາດດັ່ງກ່າວແລ້ວຈິ່ງເກີດການປ່ຽນແປງ.
ທ່ານລູ້ຄ່າງກ່າວຕື່ມວ່າ: ຊາວອາເມລິກາບາງຄົນມັກອ້າງສະເໝີວ່າຕົນເປັນຜູ້ຮັກສາກົດໝາຍທະເລ, ຂະນະທີ່ມາເຖິງປັດຈຸບັນ,ສົນທິສັນຍາກົດໝາຍທະເລຂອງອົງການສະຫະປະຊາຊາດທີ່ມີຜົນສັກສິດມາໄດ້ 34 ປີແລ້ວກໍຍັງບໍ່ຮັບຮອງສົນທິສັນຍາດັ່ງກ່າວ; ຂະນະດຽວກັນ,ຄົນເຫຼົ່ານີ້ມັກເວົ້າສະເໝີໂດຍຮຽກຮ້ອງໃຫ້ປະເທດອື່ນຮັບເອົາວິທີແກ້ໄຂຂໍ້ຂັດແຍ້ງຈາກຝ່າຍທີສາມ,ແຕ່ຕົນເອງພັດຫຼົບຫຼີກແລະສຸດທ້າຍກໍປະຕິເສດບໍ່ຍອມຮັບຄຳຕັດສິນແລະຄຳສັ່ງຈາກສານສາກົນທີ່ເປັນອົງການຕຸລາການສຳຄັນທີ່ສຸດຂອງອົງການສະຫະປະຊາຊາດ. ວິທີການສວຍໃຊ້ກົດໝາຍລະຫວ່າງຊາດ ຄື "ນຳໃຊ້ຖ້າມັນສອດຄ່ອງກັບຜົນປະໂຫຍດຂອງຕົນ ແຕ່ບໍ່ສົນໃຈຫາກມັນບໍ່ສອດຄ່ອງຜົນປະໂຫຍດຂອງຕົນ"ນັ້ນໄດ້ທຳລາຍຄວາມສັກສິດ, ຄວາມເຄັ່ງຄັດແລະຜົນສັກສິດຂອງກົດໝາຍລະຫວ່າງຊາດຢ່າງໜັກໜ່ວງ ແລະນີ້ກໍຄືຄວາມອັນຕະລາຍແລະເປັນສັນຍານເຕືອນໃຫ້ປະຊາຄົມໂລກຄວນມີສະຕິລະວັງຕົວ.
 |
