ຕາມຂ່າວCRI: ວັນທີ 15 ກໍລະກົດນີ້, ກົມສະຖິຕິແຫ່ງຊາດຈີນໄດ້ເປີດເຜີຍຕົວເລກຂໍ້ມູນເສດຖະກິດໃນ 6 ເດືອນຕົ້ນປີນີ້ ໂດຍລວມທັງຄວາມໄວໃນການເຕີບໂຕຂອງລວມຍອດຜະລິດຕະພັນພາຍໃນຫຼື GDP ໄດ້ເພີ່ມຂຶ້ນ 6,7% ເຊິ່ງໂດຍລວມແລ້ວເສດຖະກິດຈີນໄດ້ພັດທະນາໄປໃນທາງທີ່ດີແລະໝັ້ນທ່ຽງ.
ໃນ 6 ເດືອນຕົ້ນປີນີ້, ໂຄງປະກອບເສດຖະກິດຈີນໄດ້ຮັບການປັບປຸງໃຫ້ດີຂຶ້ນຢ່າງຕໍ່ເນື່ອງ ເຊິ່ງເມື່ອເບິ່ງຈາກໂຄງປະກອບອຸດສາຫະກຳແລ້ວເຫັນວ່າ: ໃນ 6 ເດືອນຕົ້ນປີນີ້ ມູນຄ່າເພີ່ມໃນອຸດສາຫະກຳທີ 3 ກວມ 54,1% ຂອງລວມຍອດຜະລິດຕະພັນພາຍໃນເພີ່ມຂຶ້ນ 1,8% ເມື່ອທຽບໄສ່ໄລຍະດຽວກັນຂອງປີຜ່ານມາ ແລະ ສູງກວ່າອຸດສາຫະກຳທີສອງ 14,7% . ຂະນະທີ່ຄວາມຕ້ອງການພາຍໃນປະເທດຍັງແມ່ນປັດໄຈຕັດສິນໃນການຮັບປະກັນເຮັດໃຫ້ເສດຖະກິດຈີນເພີ່ມຂຶ້ນຢ່າງໝັ້ນທ່ຽງ.
ເຈົ້າໜ້າທີ່ກົມສະຖິຕິແຫ່ງຊາດຈີນກ່າວວ່າ: ຈີນຈະເດັດດ່ຽວຊຸກຍູ້ການປະຕິຮູບໂຄງປະກອບດ້ານການສະໜອງ, ພະຍາຍາມຊຸກຍູ້ການປະກອບທຸລະກິດແລະການປະດິດສ້າງໃໝ່ຂອງປະຊາຊົນ, ສ້າງໂຄງປະກອບເສດຖະກິດໃໝ່ຢ່າງຕັ້ງໜ້າ, ເພີ່ມພະລັງແຮງແຫ່ງການພັດທະນາອັນໃໝ່ ເພື່ອຊຸກຍູ້ໃຫ້ເສດຖະກິດຈີນພັດທະນາໄປໃນທາງທີ່ດີແລະໝັ້ນທ່ຽງ.
 |
