ວັນທີ 19 ກໍລະກົດນີ້, ທ່ານຫຼີ້ເຄີ້ສຽງ ນາຍົກລັດຖະມົນຕີຈີນແລະທ່ານທອງລຸນ ສີສຸລິດ ນາຍົກລັດຖະມົນຕີລາວເຊິ່ງເປັນປະເທດປະທານອາຊຽນໄດ້ສົ່ງໂທລະເລກອວຍພອນເຊິ່ງກັນແລະກັນ, ໃນໂອກາດສະເຫຼີມສະຫຼອງຈີນ-ອາຊຽນສ້າງສາຍພົວພັນຄູ່ເຈລະຈາຄົບຮອບ 25 ປີຢ່າງຄຶກຄື້ນສຸດໃຈ.
ທ່ານຫຼີ້ເຄີ້ສຽງກ່າວວ່າ, ຕະຫຼອດໄລຍະ 25 ປີມານີ້, ການພົວພັນລະຫວ່າງຈີນ-ອາຊຽນໄດ້ຜ່ານຜ່າການທົດສອບທຸກປະການ, ການຮ່ວມມືລະຫວ່າງສອງຝ່າຍໄດ້ຮັບໝາກຜົນຢ່າງຫຼວງຫຼາຍໂດຍສາມາດ, ສ້າງຜົນປະໂຫຍດຢ່າງແທ້ຈິງໃຫ້ແກ່ປະຊາຊົນສອງຝ່າຍ. ຈີນຊົມເຊີຍຕໍ່ການສ້າງຕັ້ງປະຊາຄົມອາຊຽນຢ່າງເປັນທາງການແລະຫວັງເຫັນອາຊຽນເສີມຂະຫຍາຍບົດບາດໃຫຍ່ກວ່າເກົ່າໃນວຽກງານພາກພື້ນແລະສາກົນ. ຈີນຈະສະໜັບສະໜູນຂະບວນການອາຊຽນເຊື່ອມໂຍງເຂົ້າກັນແລະຖານະເປັນໃຈກາງຂອງອາຊຽນໃນການຮ່ວມມືຢູ່ພາກພື້ນ, ຈະຊຸກຍູ້ສາຍພົວພັນລະຫວ່າງຈີນ-ອາຊຽນໃຫ້ກ້າວໜ້າຂະຫຍາຍຕົວຢ່າງບໍ່ຢຸດຢັ້ງ.
ທ່ານທອງລຸນ ໄດ້ຕາງໜ້າອາຊຽນສະແດງຄວາມຊົມເຊີຍຢ່າງຈິງໃຈຕໍ່ລັດຖະບານແລະປະຊາຊົນຈີນ, ທັງໄດ້ກ່າວວ່າ, ພາຍຫຼັງຈີນ-ອາຊຽນສ້າງສາຍພົວພັນຄູ່ເຈລະຈາເປັນຕົ້ນມາ, ການພົວພັນລະຫວ່າງສອງຝ່າຍໄດ້ຮັບການພັດທະນາຢ່າງຫຼວງຫຼາຍ. ສຳລັບຄູ່ເຈລະຈາຂອງອາຊຽນ, ຈີນແມ່ນປະເທດທຳອິດທີ່ລົງນາມໃນ "ສັນຍາຮ່ວມມືໄມຕີຈິດອາຊີຕາເວັນອອກສຽງໃຕ້", ໄດ້ກາຍເປັນຄູ່ຮ່ວມມືຍຸດທະສາດປະເທດທຳອິດຂອງອາຊຽນ, ການຮ່ວມມືຍຸດທະສາດຮອບດ້ານລະຫວ່າງສອງຝ່າຍໄດ້ເພີ່ມທະວີຂຶ້ນຢ່າງບໍ່ຢຸດຢັ້ງ. ອາຊຽນຫວັງລົງເລິກການພົວພັນຄູ່ຮ່ວມມືຍຸດທະສາດກັບຈີນ, ເພື່ອປະກອບສ່ວນເຂົ້າໃນສັນຕິພາບ, ຄວາມໝັ້ນຄົງ, ສະຖຽນລະພາບແລະຄວາມຈະເລີນຮຸ່ນເຮືອງຂອງໂລກກໍຄືການພັດທະນາແບບຍືນຍົງຂອງພາກພື້ນນີ້.