ວັນທີ 19 ກໍລະກົດນີ້ຢູ່ນະຄອນຫລວງປັກກິ່ງ ສປ ຈີນ, ທ່ານ ຫຼິຢວນຊາວ ກຳມະການກົມການເມືອງສູນກາງພັກກອມມູນິດຈີນ, ຮອງປະທານປະເທດຈີນໄດ້ພົບປະກັບທ່ານພົນໂທຈັນສະໝອນ ຈັນຍາລາດ ກຳມະການກົມການເມືອງສູນກາງພັກປະຊາຊົນປະຕິວັດລາວ, ລັດຖະມົນຕີກະຊວງປ້ອງກັນປະເທດ ສປປ ລາວ.
ທ່ານ ຫຼິຢວນຊາວ ກ່າວວ່າ, ຈີນ-ລາວມີລະບອບສັງຄົມແລະທັດສະນະການພັດທະນາທີ່ຄ້າຍຄືກັນໂດຍການຮ່ວມມືເປັນກາລະໂອກາດ ໃນການພັດທະນາຂອງສອງປະເທດ. ແນວໃດກໍດີ, ຈີນມີຈຸດຢືນຢ່າງສະເໝີຕົ້ນສະເໝີປາຍແລະເດັດດ່ຽວຕໍ່ການແກ້ໄຂບັນຫາທະເລຈີນໃຕ້ໂດຍຜ່ານການປຶກສາຫາລືແລະເຈລະຈາກັນພ້ອມນີ້ກໍສະແດງຄວາມຂອບໃຈລາວທີ່ສະໜັບສະໜູນປະເທດຕົນຢ່າງແຂງແຮງຕໍ່ບັນຫາທະເລຈີນໃຕ້. ຫວັງວ່າສອງປະເທດຈະພັດທະນາການຮ່ວມມືໄມຕີຈິດມິດຕະພາບແບບຕ່າງຝ່າຍຕ່າງມີຜົນປະໂຫຍດໃຫ້ເຂົ້າສູ່ລວງເລິກແລະຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໃຫ້ໄດ້ຮັບການພັດທະນາ.
ທ່ານ ຈັນສະໝອນ ຈັນຍາລາດ ກ່າວວ່າ, ລາວໃຫ້ຄວາມສຳຄັນສູງຕໍ່ການຮ່ວມມືກັບຈີນ ທັງເຂົ້າໃຈແລະສະໜັບສະໜູນຈຸດຢືນຂອງຈີນຕໍ່ບັນຫາທະເລຈີນໃຕ້. ແນວໃດກໍດີ, ລາວສະໜັບສະໜູນໃຫ້ປະເທດທີ່ກ່ຽວຂ້ອງແກ້ໄຂຄວາມຂັດແຍ້ງຢູ່ ທະເລຈີນໃຕ້ຢ່າງສັນຕິໂດຍຜ່ານການເຈລະຈາກັນ.