ວັນທີ 24 ກໍລະກົດນີ້, ທ່ານຫວາງຢີ້, ລັດຖະມົນຕີກະຊວງການຕ່າງປະເທດຈີນໄດ້ພົບປະກັບທ່ານວິວຽນ ບາລັກຣິສນັນ, ລັດຖະມົນຕີກະຊວງການຕ່າງປະເທດສິງກະໂປຢູ່ນະຄອນຫຼວງວຽງຈັນ ສປປ ລາວ.
ທ່ານຫວາງຢີ້ກ່າວວ່າ, ໂດຍລວມແລ້ວສາຍພົວພັນລະຫວ່າງຈີນກັບອາຊຽນຂະຫຍາຍຕົວເປັນຢ່າງດີ, ຂະນະດຽວກັນກໍໄດ້ຜະເຊີນກັບການທ້າທາຍຕ່າງໆ, ເຊິ່ງຝ່າຍຕ່າງໆຕ້ອງຮ່ວມກັນພະຍາຍາມຮັກສາພາບລວມຂອງການພົວພັນສອງຝ່າຍ. ສິງກະໂປແມ່ນປະເທດໄກ່ເກ່ຍສາຍພົວພັນລະຫວ່າງຈີນກັບອາຊຽນ, ເຊິ່ງຈີນຍິນດີຮ່ວມກັບສິງກະໂປແລະປະເທດຕ່າງໆໃນອາຊຽນ, ກຳຈັດສິ່ງກີດຂວາງຕ່າງໆ, ກຳທິດທາງການພັດທະນາສາຍພົວພັນລະຫວ່າງສອງຝ່າຍຢ່າງຖືກຕ້ອງ. ສອງຝ່າຍຄວນເພີ່ມຄວາມໄວ້ເນື້ອເຊື່ອໃຈດ້ານການເມືອງ, ລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ຮັກສາຄວາມໝັ້ນຄົງຂອງພາກພື້ນ, ຮ່ວມກັນສ້າງປະຊາໂຄມຮ່ວມຊາຕາກຳໃຫ້ແໜ້ນແຟ້ນກວ່າເກົ່າ.
ທ່ານວິວຽນກ່າວວ່າ, ໃນພາບລວມແລ້ວສາຍພົວພັນລະຫວ່າງຈີນກັບອາຊຽນຂະຫຍາຍຕົວໂດຍດີແລະເຖິງວ່າມີການທ້າທາຍ, ແຕ່ບໍ່ຄວນໃຫ້ເກີດຄວາມຂັດແຍ້ງທີ່ກີດຂວາງບາດກ້າວພັດທະນາສາຍພົວພັນລະຫວ່າງສອງຝ່າຍ. ສິງກະໂປຍິນດີເພີ່ມຄວາມພະຍາຍາມຮ່ວມກັນກັບຈີນ, ຊຸກຍູ້ໃຫ້ກອງປະຊຸມລັດຖະມົນຕີຕ່າງປະເທດເທື່ອນີ້ໄດ້ຮັບຄວາມຄືບໜ້າ, ເພື່ອສົ່ງສັນຍານຕໍ່ພາຍນອກໃຫ້ຮູ້ການລົງເລິກຮ່ວມມືລະຫວ່າງສອງຝ່າຍ.