ວັນທີ 25 ກໍລະກົດນີ້, ທ່ານສີຈິ້ນຜີງ ປະທານປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານນາງສຸຊັນ ໄລສ໌ ຜູ້ຊ່ວຍວຽກງານຄວາມປອດໄພແຫ່ງຊາດຂອງປະທາ ນາທິບໍດີອາເມລິກາຢູ່ຫໍສະພາປະຊາຊົນແຫ່ງຊາດຈີນ.
ທ່ານສີຈິ້ນຜີງກ່າວເນັ້ນວ່າ, ຈີນແລະອາເມລິກາຄວນສຸມໃສ່ເພີ່ມຄວາມໄວ້ເນື້ອເຊື່ອໃຈກັນ. ເປົ້າໝາຍການພັດທະນາຂອງຈີນກໍຄືເຮັດໃຫ້ປະຊາຊົນຈີນ 1 ຕື້ 300 ລ້ານຄົນສາມາດດຳລົງຊີວິດເປັນຢ່າງດີ. ຈີນຈະບໍ່ເດີນຕາມເສັ້ນທາງເປັນເຈົ້າມະຫາອຳນາດພາຍຫຼັງປະເທດຕົນເຂັ້ມແຂງຂຶ້ນ, ກໍບໍ່ມີເຈດຕະນາທ້າທາຍລະບຽບການສາກົນໃນປັດຈຸບັນ. ຈີນແລະອາເມລິກາມີຜົນປະໂຫຍດຮ່ວມຫຼາຍກວ່າຄວາມຂັດແຍ້ງກັນແລະກໍມີຫຼາຍໆ, ບ່ອນທີ່ຕ້ອງການຮ່ວມມືແລະສາມາດຮ່ວມມືກັນ. ສອງຝ່າຍຄວນຄວບຄຸມຄວາມຂັດແຍ້ງກັນຢ່າງມີປະສິດທິຜົນ, ແລະເຄົາລົບນັບຖືຜົນປະໂຫຍດໃຈກາງຂອງກັນ.
ທ່ານສີຈິ້ນຜີງຊີ້ອອກວ່າ, ພາຍໃຕ້ສະຖານະການໃນປັດຈຸບັນ, ໃນຖານະເປັນກຸ່ມເສດຖະກິດໃຫຍ່ອັນດັບທີໜຶ່ງແລະອັນດັບທີສອງ, ອາເມລິກາແລະຈີນຄວນດຳເນີນການຮ່ວມມືຢ່າງແໜ້ນແຟ້ນ, ຮ່ວມກັນຊຸກຍູ້ກອງປະຊຸມສຸດຍອດກຸ່ມ 20 ປະເທດຫຼື G20 ຫັງໂຈ່ວໃຫ້ໄດ້ຮັບໝາກຜົນທີ່ດີ, ສົ່ງຄວາມໝັ້ນໃຈຕໍ່ທົ່ວໂລກແລະເພີ່ມພະລັງຊຸກຍູ້ໃຫ້ເສດຖະກິດໂລກພັດທະນາເຕີບໂຕ.
ທ່ານນາງໄລສ໌ກ່າວວ່າ, ທ່ານບາຣັກ ໂອບາມາເຫັນໂດຍຕະຫຼອດວ່າ, ສາຍພົວພັນລະຫວ່າງອາເມລິກາກັບຈີນແມ່ນສາຍພົວພັນສອງຝ່າຍທີ່ສຳຄັນທີ່ສຸດໂລກໃນປັດຈຸບັນ. ຂະນະທີ່ຈີນພັດທະນາສອດຄ່ອງກັບຜົນປະໂຫຍດຂອງອາເມລິກາ. ແນວໃດກໍດີອາເມລິກາເຫັນດີສອງຝ່າຍເພີ່ມຄວາມໄວ້ເນື້ອເຊື່ອໃຈກັນໂດຍຜ່ານການທຳຄວາມພະຍາຍາມຮ່ວມກັນ, ເພີ່ມທະວີການຮ່ວມມືທີ່ແທ້ຈິງແລະເຮັດໃຫ້ການຮ່ວມມືດັ່ງກ່າວກາຍເປັນສິ່ງທີ່ຄ້ຳປະກັນຄວາມໝັ້ນຄົງຂອງສາຍພົວພັນລະຫວ່າງສອງປະເທດ, ຍິນດີແລກປ່ຽນກັບຈີນຢ່າງໃກ້ຊິດເພື່ອຄວບຄຸມຄວາມຂັດແຍ້ງກັນຢ່າງມີປະສິດທິຜົນ.
 |
