ວັນທີ 2 ສິງຫານີ້, ທ່ານອູຊຽນ ໂຄສົກກະຊວງປ້ອງກັນປະເທດຈີນໄດ້ຖະແຫຼງຕໍ່ກໍບະນີທີ່ຍີ່ປຸ່ນນຳສະເໜີປຶ້ມປົກຂາວປ້ອງກັນຊາດ2016ວ່າ: ເນື້ອໃນປຶ້ມປົກຂາວປ້ອງກັນຊາດ 2016 ຍັງເນັ້ນກ່ຽວກັບຈີນຄືເກົ່າໂດຍການວິຈານທີ່ຂາດຄວາມຮັບຜິດຊອບຕໍ່ການກໍ່ສ້າງກຳລັງປ້ອງກັນປະເທດແລະກອງທັບທີ່ຊອບທຳແລະສົມເຫດສົມຜົນຂອງຈີນ, ທັງປັ້ນຂ່າວກ່ຽວກັບບັນຫາທະເລຈີນໃຕ້ແລະທະເລຈີນຕາເວັນອອກຢ່າງບໍ່ມີເຫດຜົນເຊິ່ງໂດຍລວມແລ້ວມີເນື້ອຫາທີ່ເຕັມໄປດ້ວຍເຈດຕະນາຮ້າຍຕໍ່ກອງທັບຈີນແລະເປັນການຍຸແຍ່ທຳລາຍສາຍພົວພັນຈີນກັບປະເທດໃກ້ຄຽງແລະຫຼອກລວງປະຊາຄົມໂລກ. ດ້ວຍເຫດນີ້, ກອງທັບຈີນຈິ່ງບໍ່ພໍໃຈທີ່ສຸດແລະຄັດຄ້ານຢ່າງເດັດດ່ຽວ ທັງຕໍ່ວ່າທັກທ້ວງຢ່າງເຄັ່ງຂຶມຕໍ່ຍີ່ປຸ່ນ.
ທ່ານອູຊຽນກ່າວວ່າ: ສິ່ງທີ່ຍີ່ປຸ່ນກະທຳນັ້ນຈຸດປະສົງທີ່ແທ້ຈິງກໍເພື່ອສ້າງຂໍ້ອ້າງໃຫ້ແກ່ຕົນໃນການປັບປຸງນະໂຍບາຍການທະຫານແລະຄວາມໝັ້ນຄົງຢ່າງໃຫຍ່ທັງຂະຫຍາຍອາວຸດຍຸດໂທປະກອນລວມໄປເຖິງການດັດແກ້ລັດຖະທຳມະນູນສັນຕິພາບເຊິ່ງການກະທຳດັ່ງກ່າວນີ້ເຮັດໃຫ້ປະຊາຄົມໂລກຕິດຕາມແລະມີສະຕິລະວັງຕົວສູງ. ພວກຂ້າພະເຈົ້າເຕືອນໃຫ້ຍີ່ປຸ່ນທົບທວນຄືນປະຫວັດສາດ,ເຄົາລົບຄວາມເປັນຈິງ, ຢຸດ ການຕຳໜິປະເທດຈີນຢ່າງບໍ່ມີເຫດຜົນ,ຢຸດການຍຸແຍ່ທຳລາຍສາຍພົວພັນລະຫວ່າງປະເທດ, ຢຸດການຫຼອກລວງປະຊາຄົມໂລກແລ້ວຫັນມາສູ່ການສ້າງເງື່ອນໄຂເພື່ອປັບປຸງແລະພັດທະນາສາຍພົວພັນຈີນ-ຍີ່ປຸ່ນໃຫ້ດີຂຶ້ນດ້ວຍການກະທຳຕົວຈິງ.