ວັນທີ 3 ສິງຫານີ້, ທ່ານສະເຕຟານ ດຸຍຈາຣິກ ໂຄສົກເລຂາທິການໃຫຍ່ອົງການສະຫະປະຊາຊາດກ່າວວ່າ, ທ່ານບັນກິມູນ ເລຂາທິການໃຫຍ່ອົງການສະຫະປະຊາຊາດຮູ້ສຶກສະເທືອນໃຈຫຼາຍທີ່ ສປປ ເກົາຫຼີຍິງລູກສອນໄຟນຳວິຖີໃນວັນທີ 3 ສິງຫານີ້, ແລະໄດ້ຮຽກຮ້ອງໃຫ້ ສປປ ເກົາຫຼີຢຸດການກະທຳແບບນີ້ແລະກັບຄືນສູ່ການເຈລະຈາຄືນໃໝ່.
ໃນພິທີຖະແຫຼງຂ່າວທີ່ຈັດຂຶ້ນໃນວັນທີ 3 ສິງຫານີ້, ທ່ານດຸຍຈາຣິກກ່າວວ່າ, ການທີ່ ສປປ ເກົາຫຼີຍິງລູກສອນໄຟນຳວິຖີໄດ້ທຳລາຍສັນຕິພາບແລະສະຖຽນລະພາບຂອງພາກພື້ນຢ່າງໜັກໜ່ວງ. ເຊິ່ງອີກເທື່ອໜຶ່ງອົງການສະຫະປະຊາຊາດຮຽກຮ້ອງໃຫ້ ສປປ ເກົາຫຼີຄວນຮັບຟັງຄວາມຮຽກຮ້ອງຂອງປະຊາຄົມໂລກ, ປ່ຽນທິດທາງຂອງຕົນ, ກັບຄືນສູ່ຂະບວນການເຈລະຈາຢ່າງກົງໄປກົງມາ. ໂດຍທ່ານບັນກີມູນສະໜັບສະໜູນການເຈລະຈາ 6 ຝ່າຍມາໂດຍຕະຫຼອດແລະຮຽກຮ້ອງໃຫ້ ສປປ ເກົາຫຼີຢຸດການຍິງລູກສອນໄຟນຳວິຖີ.
ຂ່າວສານໂຢນຮັບສາທາລະນະລັດສເກົາຫຼີໄດ້ອ້າງແຫຼ່ງຂ່າວຂອງຫ້ອງເສນາທິການໃຫຍ່ກອງທັບສເກົາຫຼີລາຍງານໃນວັນທີ 3 ສິງຫານີ້ວ່າ, ສປປ ເກົາຫຼີໄດ້ຍິງລູກສອນໄຟນຳວິຖີລູກໜຶ່ງໃສ່ເຂດທະເລພາກຕາເວັນອອກຂອງແຫຼມເກົາຫຼີ.