ຕອນເຊົ້າວັນທີ 5 ສິງຫານີ້, ທ່ານກ່າວຫູເສິງ ລັດຖະມົນຕີກະຊວງການຄ້າຈີນໄດ້ເຂົ້າຮ່ວມກອງປະຊຸມລັດຖະມົນຕີເສດຖະກິດການຄ້າຂອງປະເທດກອງປະຊຸມສຸດຍອດອາຊີຕາເວັນອອກຫຼື EAS ຄັ້ງທີ 4 ໃນໂອກາດນຳຄະນະເຂົ້າຮ່ວມກອງປະຊຸມລັດຖະມົນຕີເສດຖະກິດການຄ້າການຮ່ວມມືອາຊີຕາເວັນອອກແລະກອງປະຊຸມທີ່ກ່ຽວຂ້ອງ.
ໂອກາດດັ່ງກ່າວ, ທ່ານກ່າວຫູເສິງຢືນຢັນວ່າ: ການພັດທະນາເປັນໜ້າທີ່ສຳຄັນໜຶ່ງຂອງບັນດາປະເທດໃນໂລກເຊິ່ງປັດຈຸບັນ, ເສດຖະກິດໂລກມີປັດໄຈທີ່ບໍ່ໝັ້ນທ່ຽງແລະບໍ່ແນ່ນອນເພີ່ມຂຶ້ນ, ແນວໃດກໍດີ, ໂລກາພິວັດຍັງຄົງແມ່ນທ່າອ່ຽງຍຸກສະໄໝນີ້ທີ່ບໍ່ສາມາດຕ່າວປີ້ນໄດ້, ການແບ່ງງານແລະການຮ່ວມມືໃນທົ່ວໂລກໄດ້ຍົກສູງປະສິດທິພາບແລະເປີດກວ້າງຕະຫຼາດ, ບັນດາປະເທດໄດ້ແບ່ງປັນການຂະຫຍາຍຕົວແລະຄວາມຈະເລີນເຕີບໂຕຂອງເສດຖະກິດໂລກ ແລະມີສາຍພົວພັນແໜ້ນແຟ້ນຍິ່ງຂຶ້ນ. ນັບແຕ່ເກີດວິກິດການການເງິນສາກົນ ເປັນຕົ້ນມາ, ການລົງທຶນຂ້າມຊາດຈົນເຖິງປັດຈຸບັນກໍຍັງບໍ່ທັນໄດ້ຟື້ນຕົວຄືນສູ່ລະດັບກ່ອນເກີດວິກິດການເທື່ອ. ຖ້າຢາກຟື້ນຟູພະລັງແຮງຊຸກຍູ້ເສດຖະກິດໂລກໃຫ້ຂະຫຍາຍຕົວກໍຈຳເປັນຕ້ອງກະຕຸ້ນການຄ້າແລະການລົງທຶນໃຫ້ຟື້ນຕົວຄືນ. ແນວໃດກໍດີ, ຈີນສະໜັບສະໜູນໃຫ້ຂະບວນການໂລກາພິວັດແລະ ລະບົບການຄ້າຫຼາຍຝ່າຍເສີມຂະຫຍາຍບົດບາດຕົ້ນຕໍ, ຄັດຄ້ານລັດທິປົກປ້ອງທຸກຮູບແບບຢ່າງເດັດດ່ຽວ ທັງມີຈຸດຢືນໃຫ້ບັນດາປະເທດເພີ່ມທະວີການປະສານງານນະໂຍບາຍມະຫາພາກ, ຮ່ວມມືກັນເພື່ອຮັບມືກັບສິ່ງທ້າທາຍຕ່າງໆ.
ທ່ານ ກ່າວຫູເສີງ ກ່າວເນັ້ນວ່າ: ໃນເດືອນກໍລະກົດຜ່ານມາ, ນະຄອນຊຽງໄຮປະສົບຜົນສຳເລັດໃນການຈັດກອງປະຊຸມລັດຖະມົນຕີການຄ້າຂອງກຸ່ມ 20 ປະເທດຫຼື G20 ໂດຍໄດ້ບັນລຸການຫັນກອງປະຊຸມເປັນກົນໄກ ແລະເປັນການກຽມໝາກຜົນດ້ານເສດຖະກິດການຄ້າທີ່ແທ້ຈິງໃຫ້ແກ່ກອງປະຊຸມສຸດຍອດຫັງໂຈ່ວ,ຊຸກຍູ້ໃຫ້ກອງປະຊຸມ G20 ຈາກກົນໄກຮັບມືກັບວິກິດການຫັນເປັນເວທີຄຸ້ມຄອງທີ່ມີປະສິດທິຜົນແບບຍາວນານ. ຈີນໄດ້ຍຶດໝັ້ນທັດສະນະການຮ່ວມມືແບບຕ່າງຝ່າຍຕ່າງມີຜົນປະໂຫຍດມາໂດຍຕະຫຼອດ, ຍິນດີຮ່ວມກັບບັນດາຝ່າຍບົນພື້ນຖານຫຼັກການປຶກສາຫາລື,ກໍ່ສ້າງແລະຊົມໃຊ້ຮ່ວມກັນ,ພ້ອມກັນຊຸກຍູ້ການກໍ່ສ້າງ "ໜຶ່ງແລວທາງໜຶ່ງເສັ້ນທາງ" ເພື່ອເພີ່ມພະລັງແຮງໃໝ່ເຂົ້າໃນການເຕີບໂຕຂອງເສດຖະກິດໂລກແລະການຮ່ວມມືເສດຖະກິດໃນພາກພື້ນ. ຈີນແມ່ນກຸ່ມເສດຖະກິດທີ່ໃຫຍ່ອັນດັບທີ 2,ການປະຕິບັດວຽກງານຂອງຕົນໃຫ້ດີກໍເປັນການປະກອບສ່ວນອັນໃຫຍ່ຫຼວງທີ່ສຸດຕໍ່ໂລກ. ນັບແຕ່ຕົ້ນປີນີ້ເຖິງປັດຸຈບັນ, ຈີນໄດ້ເປີດກວ້າງຄວາມຕ້ອງການໂດຍລວມຢ່າງເໝາະສົມ, ລົງເລິກຊຸກຍູ້ການປະຕິຮູບໂຄງປະກອບການຕອບສະໜອງ, ເສດຖະກິດໃນ 6 ເດືອນຕົ້ນປີນີ້ໄດ້ເພີ່ມຂຶ້ນ 6,7% ເຊິ່ງເປັນໜຶ່ງໃນພະລັງແຮງແຫ່ງການເຕີບໂຕທີ່ສຳຄັນຂອງເສດຖະກິດໂລກ.
ທ່ານ ກາວຫູເສິງ ຊີ້ໃຫ້ເຫັນວ່າ, ໂດຍລວມແລ້ວ, ເສດຖະກິດຂອງບັນດາປະເທດໃນອາຊີຕາເວັນອອກໄດ້ອາໄສຕະຫຼາດພາຍນອກອ່າວສູງເຊິ່ງການຊຸກຍູ້ການຮ່ວມມືໃນພາກພື້ນແລະສາກົນສອດຄ່ອງກັບຜົນປະໂຫຍດຂອງທຸກປະເທດສະ ມາຊິກ. ຂະນະທີ່ສະພາບການຂອງແຕ່ລະປະເທດໃນອາຊີມີຄວາມແຕກຕ່າງກັນຫຼາຍ, ຈາກນີ້ຈຶ່ງໄດ້ສ້າງຮູບການຮ່ວມມືທີ່ປຶກສາຫາລືຢ່າງສະເໝີພາບກັນແລະຄຳນຶງເຖິງຄວາມເປັນຫ່ວງຂອງກັນແລະກັນຢ່າງເຕັມສ່ວນໃນໄລຍະຍາວນານຜ່ານມາໂດຍໄດ້ສະໜອງປະສົບການຂອງອາຊີໃຫ້ແກ່ການຄຸ້ມຄອງເສດຖະ ກິດທົ່ວໂລກ. ແນວໃດກໍດີ, ວຽກງານພາກພື້ນຕ້ອງໃຫ້ປະເທດຕ່າງໆປຶກສາຫາລືກັນ ໂດຍຈີນຍິນດີຮ່ວມກັບຝ່າຍຕ່າງໆ ຊຸກຍູ້ຂະບວນການເຊື່ອມໂຍງເສດຖະກິດຂອງພາກພື້ນອາຊີປາຊິຟິກເຂົ້າກັນແລະກໍຫວັງວ່າຈະເພີ່ມລັກສະນະເປີດກວ້າງແລະກວມລວມຂອງລະບົບການຄ້າເສລີໃນພາກພື້ນນີ້ໃຫ້ຫຼາຍກວ່າເກົ່າທັງຖອດຖອນບົດຮຽນເພື່ອຊຸກຍູ້ເຊິ່ງກັນແລະກັນ. ນອກນີ້, ຈີນຍິນດີເພີ່ມທະວີການຮ່ວມມືກັບຝ່າຍຕ່າງໆເພື່ອຮ່ວມກັນຊຸກຍູ້ "ແຜນການຈັດຕັ້ງປະຕິບັດຖະແຫຼງການພະນົມເປັນ". ແນວໃດກໍດີ, ຈີນຊົມເຊີຍແລະສະໜັບສະໜູນທີ່ລາວລິເລີ່ມປະກາດຖະແຫຼງການວຽງຈັນກ່ຽວກັບການຊຸກຍູ້ການຮ່ວມມືພັດທະນາພື້ນຖານໂຄງລ່າງອາຊີຕາເວັນອອກ ໃນກອງປະຊຸມສຸດຍອດອາຊີຕາເວັນອອກໃນປີນີ້.
ກອງປະຊຸມເທື່ອນີ້ມີເຈົ້າໜ້າທີ່ຮັບຜິດຊອບຂະແໜງການເສດຖະກິດ-ການຄ້າຂອງ 10 ປະເທດອາຊຽນ, ອາເມລິກາ, ຣັດເຊຍ, ຍີ່ປຸ່ນ, ສ.ເກົາຫຼີ, ອົສຕຣາລີ, ນູແວນເຊລັງ, ອິນເດຍພ້ອມດ້ວຍເລຂາທິການໃຫຍ່ອາຊຽນເຂົ້າຮ່ວມ.
