ແຫຼ່ງຂ່າວຈາກພິທີຖະແຫຼງຂ່າວທີ່ຄະນະກຳມະການຈັດກອງປະຊຸມສຸດຍອດອຸດສາຫະກຳການຄ້າຂອງກຸ່ມ 20 ປະເທດ ຫຼື B20 ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 10 ສິງຫານີ້ໃຫ້ຮູ້ວ່າ ບົດລາຍງານປະກອບຄຳຄິດຄຳເຫັນດ້ານນະໂຍບາຍທີ່ໄດ້ເຕົ້າໂຮມສະຕິປັນຍາຂອງວົງການອຸດສາຫະກຳການຄ້າທົ່ວໂລກສະບັບໜຶ່ງ ເຊິ່ງເປັນວຽກງານໃຈກາງຂອງ B20 ໃນປີ 2016 ໄດ້ຂຽນສຳເລັດຮຽບຮ້ອຍແລ້ວ ໂດຍໃນບົດລາຍງານດັ່ງກ່າວໄດ້ສະເໜີນະໂຍບາຍ 20 ຂໍ້ ແລະຈະຍື່ນໃຫ້ກອງປະຊຸມສຸດຍອດຂອງ G20 ຢ່າງເປັນທາງການໃນກອງປະຊຸມສຸດຍອດ B20 ທີ່ຈະຈັດຂຶ້ນໃນຕົ້ນເດືອນໜ້ານີ້.
ໃນພິທີຖະແຫຼງຂ່າວ, ທ່ານຢີຜິງ ຜູ້ປະສານງານ B20 ປະຈຳປີ 2016, ຮອງປະທານຄະນະກຳມະການຈັດກອງປະຊຸມສຸດຍອດ B20 ໄດ້ໃຫ້ຮູ້ວ່າ: ໂດຍປິ່ນອ້ອມຫົວຂໍ້ຫຼັກ ແລະຫົວຂໍ້ຍ່ອຍຂອງກອງປະຊຸມສຸດຍອດ G20, ປີນີ້ຈະປະກອບຄຳຄິດຄຳເຫັນຕໍ່ນະໂຍບາຍ 4 ດ້ານ ຄື ປະດິດສ້າງໃໝ່ກ່ຽວກັບຮູບແບບການເຕີບໂຕ, ການຄຸ້ມຄອງເສດຖະກິດແລະການທະນາຄານທົ່ວໂລກທີ່ມີປະສິດທິຜົນກວ່າເກົ່າ, ການຄ້າແລະການລົງທຶນສາກົນທີ່ແຂງແຮງ ແລະ ຊຸກຍູ້ການພັດທະນາແບບກວມລວມແລະມີບົດບາດຊຸກຍູ້ກັນ ໂດຍປະກອບເປັນ "ບົດລາຍງານປະກອບຄຳຄິດຄຳເຫັນດ້ານນະໂຍບາຍຈາກ B20" ເຊິ່ງເປັນການປະກອບຄຳຄິດຄຳເຫັນຕໍ່ G20 ໃນການວາງມາດຕະການຊຸກຍູ້ການເຕີບໂຕ ແລະ ແຜນການຄຸ້ມຄອງໃນສາກົນ.
