ທ່ານນາງຮວ້າຊຸນຢິງ ໂຄສົກກະຊວງການຕ່າງປະເທດຈີນ ກ່າວໃນວັນທີ 9 ສິງຫານີ້ວ່າ: ຈີນຈະຈັດກອງປະຊຸມເຈົ້າໜ້າທີ່ອາວຸໂສວ່າດ້ວຍການຈັດຕັ້ງປະຕິບັດ "ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້" ຄັ້ງທີ 13 ຢູ່ເຂດປົກຄອງຕົນເອງມົງໂກໃນ ໃນວັນທີ 16 ສິງຫານີ້ ໂດຍທ່ານຫຼິວເຈີ້ນໝິນ ຮອງລັດຖະມົນຕີກະຊວງການຕ່າງປະເທດຈີນ ແລະ ເຈົ້າໜ້າທີ່ອາວຸໂສກະຊວງການຕ່າງປະເທດຂອງບັນດາປະເທດໃນອາຊຽນຈະເຂົ້າຮ່ວມ, ຂະນະທີ່ກ່ອນຈະຈັດກອງປະຊຸມດັ່ງກ່າວ ຈະຈັດກອງປະຊຸມໜ່ວຍວຽກງານປະສົມຄັ້ງທີ 18 ກ່ຽວກັບການຈັດຕັ້ງປະຕິບັດຖະແຫຼງການດັ່ງກ່າວ.
ທ່ານນາງຮວ້າຊຸນຢິງ ກ່າວຕື່ມວ່າ: ຈີນແລະບັນດາປະເທດໃນອາຊຽນຈະສືບຕໍ່ແລກປ່ຽນຄຳຄິດຄຳເຫັນຢ່າງເລິກເຊິ່ງກ່ຽວກັບການຈັດຕັ້ງປະຕິບັດ ແລະ ຊຸກຍູ້ການປຶກສາຫາລື "ກົດແຫ່ງການປະພຶດໃນທະເລຈີນໃຕ້" ໂດຍອີງຕາມເນື້ອໃນຈິດໃຈຖະແຫຼງການຮ່ວມຂອງລັດຖະມົນຕີກະຊວງການຕ່າງປະເທດຈີນແລະປະເທດໃນອາຊຽນວ່າດ້ວຍການຈັດຕັ້ງປະຕິບັດ "ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້" ຢ່າງມີປະສິດທິຜົນຮອບດ້ານ.
