ເວັບໄຊສູນຈີນ-ອາຊຽນແຈ້ງຂ່າວວ່າ: ກອງປະຊຸມເວທີປຶກສາຫາລືຜູ້ນຳອາຊຽນຄັ້ງທີ 13 ໄດ້ອັດລົງແລ້ວດ້ວຍຜົນສຳເລັດອັນຈົບງາມຢູ່ນະຄອນຫຼວງວຽງຈັນ ສປປ ລາວເມື່ອມໍ່ໆມານີ້ໂດຍຜູ້ເຂົ້າຮ່ວມ 20 ກວ່າທ່ານ ຈາກລັດຖະບານປະເທດສະມາຊິກອາຊຽນ, ອົງການປົກຄອງເຂດບໍລິຫານພິເສດຮົງກົງຈີນ, ອົງການຈັດຕັ້ງສາກົນ,ສະມາຄົມມິດຕະພາບ, ສະພາການຄ້າ, ຂະແໜງການວິຊາການແລະສື່ມວນຊົນໄດ້ປຶກສາຫາລືກັນໂດຍໄດ້ຮັບໝາກຜົນອັນອຸດົມສົມບູນ.
ຜູ້ເຂົ້າຮ່ວມໄດ້ປະກອບຄຳເຫັນວ່າ: ໄປຄຽງຄູ່ກັບການສ້າງສຳເລັດປະຊາຄົມເສດຖະກິດອາຊຽນ, ອາຊຽນໄດ້ກາຍເປັນກຸ່ມເສດຖະກິດທີ່ມີກຳລັງແຂ່ງຂັນສູງ. ອາຊຽນຄວນກຳໂອກາດດັ່ງກ່າວ, ຊຸກຍູ້ຂະບວນການຫັນເປັນອັນໜຶ່ງອັນດຽວກັນຕື່ມອີກ, ເພີ່ມກຳລັງຊຸກຍູ້ການພັດທະນາທີ່ກຳເນີດຈາກພາຍໃນເພື່ອບັນລຸການພັດທະນາຢ່າງສະໝ່ຳສະເໝີແລະຍືນຍົງ. ສັນຍາສາຍພົວພັນຄູ່ຮ່ວມເສດຖະກິດຮອບດ້ານໃນພາກພື້ນຫຼື RCEP ຈະເພີ່ມທະວີການຮ່ວມມືດ້ານການຄ້າແລະການລົງທຶນ, ເລັ່ງຂະບວນການເຊື່ອມໂຍງເຂົ້າເປັນອັນໜຶ່ງອັນດຽວກັນຂອງເສດຖະກິດອາຊີຕາເວັນອອກ, ນຳເອົາໂອກາດການຄ້າໃຫ້ອາຊຽນແລະຄູ່ເຈລະຈາໃຫ້ຫຼາຍກວ່າເກົ່າ. ເສດຖະກິດດິຈີຕອນເປັນຜົນດີຕໍ່ການຊ່ວຍປະດິດສ້າງຮູບແບບການຄ້າແລະຍົກສູງປະສິດທິພາບ. ດ້ວຍເຫດນີ້, ອາຊຽນກຳລັງເອົາໃຈໃສ່ຄົ້ນຄວ້າການນຳໃຊ້ວິທະຍາສາດເຕັກໂນໂລຊີດິຈີຕອນເຂົ້າໃນຂົງເຂດຕ່າງໆຢ່າງກວ້າງຂວາງເຊັ່ນເສດຖະກິດ, ອຸດສາຫະກຳ, ການສຶກສາແລະອື່ນໆ.
ກອງປະຊຸມເວທີປຶກສາຫາລືຜູ້ນຳອາຊຽນຄັ້ງທີ 14 ຈະຈັດຂຶ້ນຢູ່ນະຄອນຫຼວງມະນີລາປະເທດຟີລິບປິນໃນເດືອນເມສາປີ 2017.
