ໃນວັນທີ 10-11 ສິງຫານີ້, ທ່ານຣາມອສ ອະດີດປະທານາທິບໍດີຟິລິບປິນໄດ້ພົບປະກັບທ່ານນາງຟູ້ຢິງ ປະທານກຳມາທິການຕ່າງປະເທດ ສະພາປະຊາຊົນແຫ່ງຊາດຈີນ, ອະດີດເອກອັກຄະລັດຖະທູດຈີນປະຈຳຟິລິບປິນ ແລະ ສາສະດາຈານ ອູສຶເສີນ ຫົວໜ້າສະຖາບັນຄົ້ນຄວ້າທະເລຈີນໃຕ້ ຢູ່ເຂດບໍລິຫານພິເສດຮົງກົງ ໃນນາມສ່ວນຕົວ ດ້ວຍບັນຍາກາດທີ່ປິຕິຊົມຊື່ນແລະມິດຕະພາບ.
ສອງຝ່າຍໄດ້ປຶກສາຫາລືບໍ່ເປັນທາງການ ໂດຍເຫັນວ່າມີຄວາມຈຳເປັນຈະດຳເນີນການສົນທະນາເພື່ອສ້າງຄວາມໄວ້ເນື້ອເຊື່ອໃຈກັນ, ຄວາມໝັ້ນໃຈ ແລະ ຫຼຸດຜ່ອນສະພາບເຄັ່ງຕຶງລະຫວ່າງສອງຝ່າຍ ແລະເປີດທາງໃຫ້ແກ່ການຊຸກຍູ້ການຮ່ວມມືທຸກດ້ານທີ່ມີຜົນດີຕໍ່ປະຊາຊົນສອງຊາດແລະພາກພື້ນ. ແນວໃດກໍດີ, ສອງຝ່າຍລ້ວນແຕ່ຢືນຢັນໂດຍຫວັງວ່າຈະສາມາດຊອກຫາຈຸດຮ່ວມທີ່ຕ່າງຝ່າຍຕ່າງມີຜົນປະໂຫຍດໄດ້ ໂດຍສະເພາະການຮ່ວມມືກັນແກ້ໄຂຄວາມທຸກຍາກໃນສັງຄົມ ທັງເນັ້ນວ່າ, ການສ້າງຄວາມໄວ້ເນື້ອເຊື່ອໃຈກັນມີຄວາມສຳຄັນຍິ່ງຕໍ່ສາຍພົວພັນທີ່ມີຜົນປະໂຫຍດໃນໄລຍະຍາວລະຫວ່າງຟິລິບປິນ-ຈີນ.
ຜູ້ເຂົ້າຮ່ວມການພົບປະເນັ້ນວ່າ, ການພົບປະຄັ້ງນີ້ມີຂຶ້ນໃນນາມສ່ວນຕົວ ໂດຍທ່ານຕ່າງໆລ້ວນແຕ່ພໍໃຈຕໍ່ການປຶກສາຫາລືຄັ້ງນີ້ ແລະ ຫວັງວ່າສອງຝ່າຍຈະສາມາດເລີ່ມຕົ້ນຂະບວນການປຶກສາຫາລືຢ່າງເປັນທາງການ ເຊິ່ງບໍ່ວ່າຈະຢູ່ນະຄອນຫຼວງປັກກິ່ງ, ນະຄອນຫຼວງມະນີລາ ຫຼື ບ່ອນອື່ນໆກໍໄດ້ ແລະດຳເນີນການຊຸກຍູ້ຢ່າງຕໍ່ເນື່ອງແລະບໍ່ຢຸດຢັ້ງ.