ວັນທີ 20 ສິງຫານີ້, ທ່ານຊຸ່ຍທ່ຽນໄຂ້, ເອກອັກຄະລັດຖະທູດຈີນປະຈຳອາເມລິກາກ່າວຢູ່ທີ່ນະຄອນວໍຊິງຕັນວ່າ, ນັບແຕ່ກົນໄກ G20 ກຳເນີດຂຶ້ນມາຮອດປັດຈຸບັນ, ຈີນແລະອາເມລິກາໄດ້ປະສານງານຮ່ວມມືກັນຫຼາຍໃນກົນໄກດັ່ງກ່າວນີ້, ຂະນະທີ່ທົ່ວໂລກຄອງຄອຍຈີນແລະອາເມລິກາສຶບຕໍ່ເສີມຂະຫຍາຍບົດບາດທີ່ມີລັກສະນະນຳພາແລະສ້າງສັນ, ຊຸກຍູ້ກອງປະຊຸມສຸດຍອດ G20 ຫາງໂຈ່ວໃຫ້ໄດ້ຮັບຜົນສຳເລັດຢ່າງເຕັມເມັດເຕັດໜ່ວຍ.
ທ່ານຊຸ່ຍທ່ຽນໄຂ້ໃຫ້ສຳພາດຕໍ່ນັກຂ່າວວ່າ, ພາຍໃຕ້ເບື້ອງຫັຼງທີ່ສະຖານະການເສດຖະກິດໂລກບໍ່ຄັກແນ່ແລະການເຕີບໂຕທາງເສດຖະກິດຂາດເຂີນກຳລັງແຮງ, ຈີນແລະອາເມລິກາຕ້ອງເສີມຂະຫຍາຍບົດບາດໃຫຍ່ກວ່າເກົ່າ, ຮ່ວມກັນຊຸກຍູ້ໃຫ້ກອງປະຊຸມສຸດຍອດໄດ້ຮັບໝາກຜົນທີ່ມີລັກສະນະສ້າງສັນ. ສອງປະເທດມີໜ້າທີ່ອັນຈຳເປັນ, ກໍໄດ້ແລກປ່ຽນກັນກ່ຽວກັບເລື່ອງນີ້ເລື້ອຍໆ, ທັງໄດ້ຮັບຜົນເປັນຢ່າງດີໃນການແລກປ່ຽນ.
ໃນໄລຍະກອງປະຊຸມ, ທ່ານປະທານສີຈິ້ນພີງຈະພົບປະກັບທ່ານປະທານາທິບໍດີບາຣັກ ໂອບາມາ, ເຊິ່ງປະຊາຄົມໂລກໄດ້ໃຫ້ຄວາມສົນໃຈໃນລະດັບສູງ. ຕໍ່ເລື່ອງນີ້, ທ່ານຊຸ່ຍທ່ຽນໄຂ້ກ່າວວ່າ, ຄອງຄອຍການພົບປະຮອບໃໝ່ລະຫວ່າງປະມຸກລັດຈີນອາເມລິກາ ສາມາດເພີ່ມທະວີຄວາມໄວ້ເນື້ອເຊື່ອໃຈທາງຍຸດທະສາດລະຫວ່າງສອງປະເທດ, ຊີ້ໃຫ້ເຫັນທິດທາງການຮ່ວມມືພັດທະນາ, ແລະອຳນວຍການຊີ້ນຳທາງການເມືອງໃນການຄວບຄຸມຄວາມຂັດແຍ້ງກັນ.
 |
